തിരുവനന്തപുരം:കര്ണ്ണാടക സംഗീതത്തിലെ വിശേഷപ്പെട്ട രാഗമാണ് ഹനുമതോടി അല്ലെങ്കില് തോടി എന്നറിയപ്പെടുന്ന രാഗം. കര്ണ്ണാടകസംഗീതത്തിലെ 72 സമ്പൂര്ണ്ണരാഗത്തിലെ എട്ടാമത്തെ മേളകർത്താരാഗമാണ് ഹനുമതോടി അഥവാ തോടി. കച്ചേരികളിൽ ഇത് പലപ്പോഴും പാടാറുണ്ട്. പ്രയോഗത്തിലെ സങ്കീർണ്ണത കാരണം ഇത് അവതരിപ്പിക്കാൻ ബുദ്ധിമുട്ടുള്ള ഒരു രാഗമാണ് . ഈ രാഗം പഠിച്ചാല് നല്ല ഭാവം കൊടുത്ത് പാടാന് ഒരു സംഗീതജ്ഞന് സാധിക്കും എന്ന കാര്യം ഗായകന് യേശുദാസിന് നന്നായി അറിയാം. അതിനാലാണ് മകന് വിജയ് യേശുദാസിന്റെ അദ്ദേഹം തോടി രാഗം പഠിപ്പിക്കാന് പ്രത്യേകം ശ്രദ്ധ നല്കിയത്.
ഇതിന്റെ ഒരു വീഡിയോ ശ്രദ്ധേയമാണ്. യേശുദാസ് മകനെ തോടി രാഗത്തില് ത്യാഗരാജസ്വാമികള് ചിട്ടപ്പെടുത്തിയ “കൊലുവമരേ ഗഡ കോതണ്ഡപാണി” (വില്ലേന്തിയ രാമന്റെ അനുഗ്രഹത്താല് ഞാന് അനുഗൃഹീതനാണ്) എന്ന ആദിതാളത്തിലുള്ള കീര്ത്തനത്തിന്റെ ഒരു വരിയാണ് ഈ വീഡിയോയില് പഠിപ്പിക്കുന്നത് കാണാനാവുക. ‘കോതണ്ഡ’ എന്ന് ഭാവത്തോടെ ഗമകങ്ങള് ചേര്ത്ത് യേശുദാസ് പാടുമ്പോള് അത് കൃത്യമായി അനുകരിക്കാന് കഴിയാതിരിക്കുന്ന വിജയിനോട് സ്വരങ്ങള് മാത്രം പാടുന്നുവെങ്കില് കോതണ്ഡ എന്ന് ഇങ്ങിനെ പാടേണ്ടിവരും എന്നും യേശുദാസ് അല്പം അമര്ഷത്തോടെ പറഞ്ഞുകൊടുക്കുന്നത് കാണാം. യേശുദാസ് തോടി രാഗത്തിന്റെ ഭാവം മകനിലേക്ക് എത്ര പ്രാധാന്യത്തോടെയാണ് പകര്ന്നുനല്കാന് ശ്രമിക്കുന്നത് എന്ന് വീഡിയോ കണ്ടാല് മനസ്സിലാകും. ഗമകങ്ങളുടെ പിന്നിലെ സ്വരങ്ങള് അനായാസം പാടിക്കേള്പ്പിക്കുമ്പോള് യേശുദാസ് എന്ന ഗായകന്റെ കര്ണ്ണാടകസംഗീതത്തിലുള്ള ആഴത്തിലുള്ള അറിവാണ് വെളിപ്പെടുന്നത്. ശ്രീരംഗം കൊതൈ എന്ന പേരിലുള്ള ഒരാള് പങ്കുവെച്ചിരിക്കുന്ന ഈ വീഡിയോ ഒരു സ്വകാര്യ വീഡിയോ ആണെന്ന് വേണം കരുതാന്.
തോടി രാഗം പറഞ്ഞുകൊടുക്കുന്നതിനിടയില് രാഗം വിസ്തരിക്കുന്ന പ്രയോഗത്തിന് പിന്നിലെ സ്വരങ്ങളും യേശുദാസ് പാടിക്കൊടുക്കുന്നത് കേള്ക്കാം. പക്ഷെ അത് അത്ര എളുപ്പത്തില് പഠിച്ചെടുക്കാന് കഴിയുന്ന ഒന്നല്ല. അതുകൊണ്ട് വിജയ് യേശുദാസും കഷ്ടപ്പെട്ടാണ് സ്വരങ്ങള് പാടാന് ശ്രമിക്കുന്നത്. അപ്പോള് യേശുദാസ് അല്പം ഗൗരവത്തോടെ പറയുന്ന വാചകവും ഈ വീഡിയോയില് ഉണ്ട്. അത് ഇപ്രകാരമാണ്: “പ്രാക്ടീസ് മുഖ്യമാണ് അത് നീ മകനായാലും ശിഷ്യനായാലും”. നിത്യവും അഭ്യസിക്കേണ്ടതിന്റെ പ്രാധാന്യത്തെക്കുറിച്ചാണ് യേശുദാസ് മകനെ ബോധ്യപ്പെടുത്താന് ശ്രമിക്കുന്നത്.
തോടിയുടെ ആരോഹരണവും അവരോഹണവും താഴെപ്പറയും വിധമാണ്
ആരോഹണം: സ രി1 ഗ2 മ1 പ ധ1 നി2 സ
അവരോഹണം: സ നി2 ധ1 പ മ1 ഗ2 രി1 സ
തോടി രാഗത്തിന്റെ പ്രധാനപ്പെട്ട ജന്യരാഗങ്ങളാണ് ആഹിരി, പുന്നാഗവരാളി, ഭൂപാളം, ധന്യാസി എന്നിവ. തോടി രാഗത്തിലെ പ്രധാന കൃതികളാണ് നിന്നെ നമ്മി (ശ്ര്യാമശാസ്ത്രി), കനകാംഗി (പല്ലവി ഗോപാല അയ്യർ), കരുണാജലധേ (ത്യാഗരാജ സ്വാമികൾ), രാമ കോതണ്ഡ രാമ (ത്യാഗരാജസ്വാമികള്), സരസിജനാഭ (സ്വതിതിരുനാൾ) എന്നിവ. ഹിന്ദുസ്ഥാനിയിലെ കർണാടക തോഡിക്ക് തുല്യമായത് ഭൈരവി താട് ആണ് , എന്നാൽ ഗമകങ്ങളുടെ വ്യത്യസ്ത ഉപയോഗങ്ങൾ കാരണം ഇവ രണ്ടും വളരെ വ്യത്യസ്തമാണ്.
ഇനി വീഡിയോ കാണാം:
ജന്മഭൂമി ഓണ്ലൈന്