കൊല്ക്കത്ത: ആര്.ജി. കര് മെഡിക്കല് കോളേജ് ആശുപത്രിയില് വനിതാ ഡോക്ടറെ ബലാത്സംഗം ചെയ്ത് കൊലപ്പെടുത്തിയ കേസില് പ്രതി സഞ്ജയ് റോയിക്ക് ജീവപര്യന്തം തടവും 50,000 രൂപ പിഴയും ശിക്ഷ. പ്രതി ജീവിതാന്ത്യം വരെ ജയിലിൽ തുടരണം. അപൂർവങ്ങളിൽ അപൂർവമായ കേസായി ഇതിനെ പരിഗണിക്കാനാവില്ലെന്നും കോടതി ഉത്തരവിട്ടു.
സീല്ദാ കോടതിയിലെ അഡീഷണല് ഡിസ്ട്രിക്ട് ആന്ഡ് സെഷന്സ് കോടതിയാണ് ശിക്ഷ വിധിച്ചത്. പ്രതി കുറ്റക്കാരനാണെന്ന് നേരത്തെ കോടതി വിധിച്ചിരുന്നു.
സമാനതകളില്ലാത്ത ക്രൂര കൊലപാതകത്തില് രാജ്യവ്യാപകമായി തെരുവില് പ്രതിഷേധമുയര്ന്നത് മമത ബാനര്ജി സര്ക്കാറിനെ വെള്ളം കുടിപ്പിച്ചിരുന്നു. ഡോക്ടറുടെ മൃതദേഹത്തിന് സമീപത്തുനിന്ന് കിട്ടിയ ബ്ലൂടൂത്ത് ഇയര്ഫോണിന്റെ ഭാഗവും ആശുപത്രി കെട്ടിടത്തിലെ സി.സി.ടി.വി. ദൃശ്യങ്ങളും കേന്ദ്രീകരിച്ച് നടത്തിയ അന്വേഷണത്തിലാണ് പ്രതിയെ പിടികൂടിയത്. 2024 ഓഗസ്റ്റ് ഒന്പതാം തീയതിയാണ് ട്രെയിനി ഡോക്ടറെ ആശുപത്രിയിലെ സെമിനാര് ഹാളില് കൊല്ലപ്പെട്ടനിലയില് കണ്ടെത്തിയത്. ഈ സംഭവത്തിന് പിന്നാലെ ഡോക്ടര്മാരുടെ വ്യാപക പ്രതിഷേധം ഉള്പ്പെടെ രാജ്യത്ത് അരങ്ങേറി.
ഓഗസ്റ്റ് പത്താം തീയതി കേസിലെ പ്രതിയും കൊല്ക്കത്ത പോലീസിന്റെ സിവിക് വൊളണ്ടിയറുമായ സഞ്ജയ് റോയിയെ പോലീസ് അറസ്റ്റ് ചെയ്തു. പ്രതിഷേധം ശക്തമായതോടെ കോടതി പിന്നീട് കേസ് സി.ബി.ഐ.യ്ക്ക് കൈമാറി. കുറ്റകൃത്യത്തില് സഞ്ജയ് റോയി മാത്രം ഉള്പ്പെട്ടിട്ടുള്ളൂ എന്നായിരുന്നു സി.ബി.ഐ.യുടെയും കണ്ടെത്തല്. അതേസമയം, തെളിവ് നശിപ്പിക്കാന് ശ്രമിച്ചതിനും അന്വേഷണം വൈകിപ്പിച്ചതിനും മെഡിക്കല് കോളേജ് പ്രിന്സിപ്പല് സന്ദീപ് ഘോഷ്, പോലീസ് ഉദ്യോഗസ്ഥനായ അഭിജിത് മൊണ്ഡാല് എന്നിവരെയും സി.ബി.ഐ. അറസ്റ്റ് ചെയ്തു.
2024 നവംബര് നാലിനാണ് കേസിലെ പ്രതി സഞ്ജയ് റോയിക്കെതിരെ സി.ബി.ഐ. സംഘം കുറ്റപത്രം സമര്പ്പിച്ചത്. നവംബര് 11-ാം തീയതി കേസിന്റെ വിചാരണ ആരംഭിച്ചു. വിചാരണ മുഴുവനും അടച്ചിട്ട കോടതിമുറിയിലായിരുന്നു. വിചാരണ നടപടികള് ക്യാമറയിലും പകര്ത്തിയിരുന്നു.
ആകെ 50 പേരുടെ സാക്ഷിമൊഴികളാണ് കേസിലുണ്ടായിരുന്നത്. വനിതാ ഡോക്ടറുടെ മാതാപിതാക്കള്, പോലീസിലെയും സി.ബി.ഐ.യിലെയും അന്വേഷണ ഉദ്യോഗസ്ഥര്, ഡോക്ടറുടെ സഹപ്രവര്ത്തകര്, ഫൊറന്സിക് വിദഗ്ധര്, വിദഗ്ധ ഡോക്ടര്മാര് എന്നിവരടക്കമുള്ള സാക്ഷികളെ കോടതിയില് വിസ്തരിച്ചു. 2025 ജനുവരി 9-ന് വിചാരണ പൂര്ത്തിയാക്കി. തുടർന്നാണ് കോടതി കേസിൽ വിധി പറഞ്ഞത്.
