കാലടി: തിരുവൈരാണിക്കുളം മഹാദേവ ക്ഷേത്രത്തില്‍ ശ്രീ പാര്‍വ്വതീദേവിയുടെ നടതുറന്നു. ഇനിയുള്ള 11 ദിനങ്ങള്‍ ഉമാമഹേശ്വര അനുഗ്രഹത്താല്‍ ക്ഷേത്രസന്നിധി ഭക്തിസാന്ദ്രമാകും. നടതുറപ്പുത്സവത്തിന് പ്രാരംഭം കുറിച്ചുകൊണ്ടുള്ള വര്‍ണാഭമായ തിരുവാഭരണ ഘോഷയാത്ര ഇന്നലെ വൈകിട്ട് 4ന് അകവൂര്‍ മനയില്‍ നിന്നും ആരംഭിച്ചു.
മനയിലെ ശ്രീരാമസ്വാമി ക്ഷേത്രത്തില്‍ നടന്ന പ്രത്യേക പൂജകള്‍ക്ക് ശേഷം അകവൂര്‍ ചാത്തന്റെ സന്നിധിയിലെ കെടാവിളക്കില്‍ നിന്ന് അധൃത് പരമേശ്വര്‍ പകര്‍ന്നു നല്‍കിയ ദീപവും മനയിലെ കാരണവര്‍ അകവൂര്‍ കുഞ്ഞനിയന്‍ നമ്പൂതിരിപ്പാടിന്റെ പക്കല്‍ നിന്ന് ഉമാമഹേശ്വരന്മാര്‍ക്ക് ചാര്‍ത്തുന്നതിനുള്ള തിരുവാഭരണങ്ങളും ക്ഷേത്ര ട്രസ്റ്റ് പ്രസിഡന്റ് പി.യു. രാധാകൃഷ്ണന്‍, സെക്രട്ടറി എ.എന്‍. മോഹനന്‍ എന്നിവര്‍ ചേര്‍ന്ന് ഏറ്റുവാങ്ങി പ്രത്യേകം അലങ്കരിച്ച രഥത്തില്‍ പ്രതിഷ്ഠിച്ചു.
ഘോഷയാത്രയില്‍ നൂറുകണക്കിന് ബാലികമാരും യുവതികളും അണിനിരന്നു. രാത്രി ഏഴരയോടെ ഘോഷയാത്ര ക്ഷേത്രസന്നിധിയില്‍ എത്തിച്ചേര്‍ന്നപ്പോള്‍ മേല്‍ശാന്തി നടുവം നാരായണന്‍ നമ്പൂതിരി രഥത്തില്‍ നിന്ന് തിരുവാഭരണങ്ങള്‍ ഏറ്റുവാങ്ങി ശ്രീകോവിലിലെ വിഗ്രഹങ്ങളില്‍ അണിയിച്ചു.
തിരുമുഖത്തോടൊപ്പം ചെറുതാലിക്കൂട്ടം, കാശാലി, പൂത്താലി, നാഗപടത്താലി, പാലയ്‌ക്ക, കെട്ടരമ്പ് എന്നിവ ചാര്‍ത്തി ദേവിയെ സര്‍വ്വാഭരണ വിഭൂഷിതയാക്കി. ശ്രീമഹാദേവനും ആഭരണങ്ങള്‍ അണിയിച്ചു. ക്ഷേത്ര ഊരാണ്‍മക്കാരായ അകവൂര്‍, വെടിയൂര്‍, വെണ്മണി മനകളിലെ പ്രതിനിധികളും സമുദായ തിരുമേനിയും ദേവിയുടെ ഉറ്റതോഴി സങ്കല്പമായ പുഷ്പണിയും ക്ഷേത്ര ട്രസ്റ്റ് ഭാരവാഹികളും ദേവിയുടെ തിരുനടയുടെ മുന്നിലെത്തിയതോടെ നട തുറക്കുന്നതിനായുള്ള ചടങ്ങുകള്‍ ആരംഭിച്ചു.
ചടങ്ങുകള്‍ പൂര്‍ത്തിയാക്കി സമുദായ തിരുമേനിയുടെ നിര്‍ദേശപ്രകാരം ബ്രാഹ്മണിയമ്മ നടതുറന്നാലും എന്ന് പറയുകയും മേല്‍ശാന്തി ശ്രീ പാര്‍വ്വതീ ദേവിയുടെ നട തുറന്നു. ദര്‍ശനത്തിനുശേഷം രാത്രി 10ന് നട അടച്ച് ദേവിയെ പാട്ടുപുരയിലേക്ക് ആനയിച്ചു. പിന്നീട് ദേവിയെ സ്തുതിച്ചു കൊണ്ടുള്ള തിരുവാതിര കളിയും പൂത്തിരിവാതിര ചടങ്ങുകളും പാ
തിരാപൂ ചൂടലും ക്ഷേത്രത്തില്‍ നടന്നു. ക്ഷേത്ര ട്രസ്റ്റ് വൈസ് പ്രസിഡന്റ് പി.കെ. നന്ദകുമാര്‍, പബ്ലിസിറ്റി കണ്‍വീനര്‍ എം.എസ്. അശോകന്‍, മാനേജര്‍ എം.കെ. കലാധരന്‍, ഊരാണ്‍മ കുടുംബാംഗങ്ങളായ അകവൂര്‍ ശങ്കരന്‍ നമ്പൂതിരിപ്പാട്, അകവൂര്‍ ഹരിദാസ് നമ്പൂതിരിപ്പാട്, തപന്‍ അകവൂര്‍, ക്ഷേത്ര ട്രസ്റ്റ് അംഗം എ. മോഹന്‍കുമാര്‍ തുടങ്ങിയവര്‍ നടതുറപ്പ് ചടങ്ങുകള്‍ക്ക് മേല്‍നോട്ടം വഹിച്ചു. നടതുറപ്പ് വേളയില്‍ രാവിലെ 4 മുതല്‍ ഉച്ചക്ക് 1.30 വരേയും 2 മുതല്‍ രാത്രി 9 വരെയുമാണ് ദര്‍ശനം. നടതുറപ്പ് മഹോത്സവം 23 നാണ് സമാപിക്കുക.
പ്രതികരിക്കാൻ ഇവിടെ എഴുതുക: