തിരൂര്‍: ഭാരതം ലോകത്തിന് സമ്മാനിച്ച സന്ദേശങ്ങള്‍ ഉയര്‍ത്തിക്കാട്ടി പാശ്ചാത്യ ആശയങ്ങളില്‍ നിന്നും പ്രേരണ ഉള്‍ക്കൊണ്ട് നമുക്ക് ചുറ്റും വ്യാപിച്ച അപകടകരമായ രൂപാന്തരങ്ങളെ ചെറുക്കണമെന്ന് പ്രജ്ഞാപ്രവാഹ് ദേശീയ സംയോജകന്‍ ജെ. നന്ദകുമാര്‍.
മലപ്പുറം തിരൂരില്‍ നടക്കുന്ന ഭാരതീയ വിചാരകേന്ദ്രം 42-ാം സംസ്ഥാന സമ്മേളനത്തിന്റെ ഉദ്ഘാടനവും ‘കള്‍ച്ചറല്‍ മാര്‍ക്‌സിസം അരാജകത്വത്തിന്റെ പ്രത്യയശാസ്ത്രം’ എന്ന വിഷയാവതരണം നടത്തിയും സംസാരിക്കുകയായിരുന്നു അദ്ദേഹം. പുതിയ കാലത്തെ മാര്‍ക്‌സിസ്റ്റ് നേതാക്കള്‍ വിവേകാന്ദനേയും ശ്രീനാരായണ ഗുരുവിനെയും മന്നത്തു പദ്മനാഭനെയും പാര്‍ട്ടിക്കൊടി ഉടുപ്പിക്കാനുള്ള ശ്രമമാണ് നടത്തികൊണ്ടിരിക്കുന്നത്.
ഇത്തരം വ്യാജപ്രചാരണങ്ങള്‍ പുതിയ കാലഘട്ടത്തില്‍ സത്യമാണെന്ന് ധരിച്ചുപോകുന്ന സ്ഥിതിവിശേഷമാണ് ഇന്നുള്ളത്. ഇത് കൃത്യമായി മനസിലാക്കാനും അത് തിരുത്താനും നമുക്ക് സാധിക്കണം. ഇത്തരം പാശ്ചാത്യ ആശയത്തില്‍ നിന്നും പ്രേരണ ഉള്‍ക്കൊണ്ട് വന്നുചേര്‍ന്നിട്ടുള്ള ഒട്ടനവധി രൂപാന്തരങ്ങള്‍ മുന്നിലുണ്ട്. കള്‍ച്ചറല്‍ മാര്‍ക്‌സിസം, യഥാര്‍ത്ഥ സംസ്‌കാരത്തെ റദ്ദ് ചെയ്യല്‍, പാശ്ചാത്യ നാടുകളില്‍ നിന്നും കേരളത്തിന്റെ കലാലയങ്ങളില്‍ പടര്‍ന്നുകഴിഞ്ഞ ഓക്കിസം തുടങ്ങി നിരവധി ആശയങ്ങള്‍ നമുക്ക് ചുറ്റും പ്രചരിക്കുകയാണ്. ഇത് തിരിച്ചറിയുന്നതിനും പ്രതിരോധിക്കുന്നതിനും ഒപ്പം ഭാരതത്തിന്റെ സംസ്‌കൃതി മുന്നോട്ട് വയ്‌ക്കാനും നമുക്ക് സാധിക്കണം. ഉണര്‍വിന്റെ സന്ദേശങ്ങളായ ‘തസ്മാത് ജാഗ്രതാ’, ‘ഉത്തിഷ്ഠതാ ജാഗ്രതാ’ തുടങ്ങിയവ ലോകമെമ്പാടും പ്രധാനമായും ചെയ്തത് ഭാരതമാണ്. സനാതന ധര്‍മ്മം നമ്മളിലൂടെയാണ് നിലനില്‍ക്കുന്നത് എന്ന ബോധ്യം എപ്പോഴും ഉണ്ടാകണമെന്നും അദ്ദേഹം പറഞ്ഞു.
മഹര്‍ഷി അരവിന്ദ വിചാരത്തിന്റെയും വിവേകാന്ദ വിചാരത്തിന്റെയും പിന്‍ഗാമി എന്ന നിലയിലാണ് പരമേശ്വര്‍ജി വിചാരകേന്ദ്രത്തിന് തുടക്കം കുറിച്ചത്. കേരളത്തിന്റെയും ഭാരതത്തിന്റെയും ചിന്താമണ്ഡലത്തെ ശരിയായ ദിശയിലേക്ക് മാറ്റി തെളിച്ച ആചാര്യനായിരുന്നു പരമേശ്വര്‍ജിയെന്ന് അദ്ദേഹം ഓര്‍മിപ്പിച്ചു.
പുതിയ ഭരണഘടനാ സമിതിയിലൂടെ ഭാരത ഭരണഘടന തിരുത്തി എഴുതപ്പെടേണ്ടതാണെന്നും ഭരണഘടന അങ്ങനെ തന്നെ നിലനിര്‍ത്തണമെന്നും രണ്ട് വാദമുണ്ട്. രണ്ട് വീക്ഷണവും ശരിയാണെന്ന് സംഘത്തിനോ വിചാരകേന്ദ്രത്തിനോ പക്ഷമില്ല. സുന്ദരവും ശക്തവുമായ ജനാധിപത്യത്തെ ശക്തിപ്പെടുത്തുകയും വരുന്ന കാലങ്ങളിലെ വെല്ലുവിളികളെ നേരിടാന്‍ പൗരന്‍മാരെ പ്രാപ്തരാക്കുകയും ചെയ്യുന്ന കാലഘട്ടത്തിന്റെ സ്മൃതിയാണ് ഭരണഘടന. സവിശേഷമായ കാലഘട്ടത്തിലൂടെ കടന്ന് നാം പുതിയ കര്‍ത്തവ്യബോധത്തിന്റെ കാലഘട്ടത്തിലേക്ക് പ്രവേശിക്കാന്‍ പോവുകയാണ്. ഉറച്ച തലത്തില്‍ നിന്നുകൊണ്ടുവേണം 2047നെ കുറിച്ച് സ്വപ്‌നം കാണാനും തയാറെടുപ്പ് നടത്താനുമെന്ന് അദ്ദേഹം വ്യക്തമാക്കി.
ഭാരതീയ വിചാരകേന്ദ്രം ഡയറക്ടര്‍ ആര്‍. സഞ്ജയന്‍ അധ്യക്ഷത വഹിച്ചു. കുസാറ്റ് പ്രൊഫ. ഡോ. ഡി. മാവോത്ത്, ഭാരതീയ വിചാരകേന്ദ്രം അധ്യക്ഷന്‍ പ്രൊഫ. സി.വി. ജയമണി, ജനറല്‍ സെക്രട്ടറി കെ.സി. സുധീര്‍ബാബു, സ്വാഗതസംഘം കാര്യാധ്യക്ഷന്‍ അഡ്വ. എന്‍. അരവിന്ദന്‍ എന്നിവര്‍ സംസാരിച്ചു.
സമ്മേളനത്തില്‍ ഇന്ന്
രാവിലെ 8.30ന് വിവേകാനന്ദ ജയന്തി ദിനത്തില്‍ പുഷ്പാര്‍ച്ചന നടക്കും. തുടര്‍ന്ന് രാവിലെ 9ന് ‘1924 ലെ ആലുവ സര്‍വമത സമ്മേളനം-ആനുകാലിക പ്രസക്തി’ എന്ന വിഷയം കാലടി സംസ്‌കൃത സര്‍വകലാശാല മുന്‍ വിസി ഡോ. കെ.എസ്. രാധാകൃഷ്ണന്‍, ‘വഖഫ് രാഷ്‌ട്രീയവും ഭാരതത്തിന്റെ പരമാധികാരവും’ എന്ന വിഷയം മുന്‍ രാജ്യസഭാംഗം പ്രൊഫ. രാകേഷ് സിന്‍ഹ എന്നിവര്‍ അവതരിപ്പിക്കും.
ഉച്ചയ്‌ക്കുശേഷം ‘ഹിന്ദു ജനത-ആഗോള വെല്ലുവിളികള്‍’ എന്ന വിഷയം ഇന്ത്യ ഫൗണ്ടേഷന്‍ പ്രസിഡന്റ് രാംമാധവ് അവതരിപ്പിക്കും. വൈകീട്ട് 3.30ന് നടക്കുന്ന സമാപനസഭ കല്‍ക്കട്ട വിശ്വഭാരതി സര്‍വകലാശാല റിട്ട. പ്രൊഫ. കലാമണ്ഡലം പോരൂര്‍ ശങ്കരനാരായണന്‍ ഉദ്ഘാടനം ചെയ്യും. ഭാരതീയ വിചാരകേന്ദ്രം സംസ്ഥാന പ്രസിഡന്റ് ഡോ. സി.വി. ജയമണി സമാപന സന്ദേശം നല്കും. സംസ്ഥാന വര്‍ക്കിങ് പ്രസിഡന്റ് ഡോ. എസ്. ഉമാദേവി അധ്യക്ഷത വഹിക്കുന്ന ചടങ്ങില്‍ ഡയറക്ടര്‍ ആര്‍. സഞ്ജയന്‍, ജനറല്‍ സെക്രട്ടറി കെ.സി. സുധീര്‍ബാബു, ജില്ലാ പ്രസിഡന്റ് ഡോ. എം.പി. രവിശങ്കര്‍, സ്വാഗതസംഘം ജനറല്‍ കണ്‍വീനര്‍ രാമചന്ദ്രന്‍ പാണ്ടിക്കാട് എന്നിവര്‍ സംസാരിക്കും.
പ്രതികരിക്കാൻ ഇവിടെ എഴുതുക: