പത്തനംതിട്ട : മകരവിളക്ക് ദര്‍ശനം സുഗമമാക്കാന്‍ കൂടുതല്‍ ക്രമീകരണങ്ങളും നിയന്ത്രണങ്ങളും നടപ്പാക്കുകയാണെന്ന് തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് പി എസ് പ്രശാന്ത്.പമ്പയിലെ സ്‌പോട്ട് ബുക്കിംഗ് കേന്ദ്രങ്ങള്‍ വ്യാഴാഴ്ച മുതല്‍ നിലയ്‌ക്കലിലാണ് പ്രവര്‍ത്തിക്കുക. വെര്‍ച്വല്‍ , സ്‌പോട്ട് ബുക്കിംഗ് നടത്താത്ത തീര്‍ത്ഥാടകരെ പമ്പയിലേക്ക് കടത്തിവിടില്ല.
സ്‌പോട്ട് ബുക്കിംഗിലൂടെയാണ് ഇപ്പോള്‍ ഏറ്റവും കൂടുതല്‍ ആളുകള്‍ വരുന്നത്. പമ്പയില്‍ സ്ഥാപിച്ചിരിക്കുന്ന തത്സമയ ബുക്കിംഗ് സെന്ററിലേക്ക് നിയന്ത്രിക്കാന്‍ പറ്റാത്ത തരത്തില്‍ ആളെത്തുകയാണ്. വ്യാഴാഴ്ച മുതല്‍ തിങ്കളാഴ്ച വരെ സ്‌പോട്ട് ബുക്കിംഗ് 5000 പേര്‍ക്കും മകരവിളക്ക് ദിനമായ ചൊവ്വാഴ്ച 1000 പേര്‍ക്കുമായിരിക്കും സ്‌പോട് ബുക്കിംഗ് സാധ്യമാവുക.
ശനിയാഴ്ച മുതല്‍ കാനനപാത വഴി തീര്‍ത്ഥാടകരെ സന്നിധാനത്തേക്ക് കടത്തി വിടില്ല. ഇത് ഭക്തജനങ്ങളുടെ സുരക്ഷയെ കരുതിയാണ്. ഞായറാഴ്ച മുതല്‍ പമ്പയിലെ പാര്‍ക്കിംഗ് ഒഴിവാക്കാന്‍ ആലോചനയുണ്ട്.
പ്രതികരിക്കാൻ ഇവിടെ എഴുതുക: