പാലക്കാട് :പന്നിയങ്കര ടോള്‍ പ്ലാസയില്‍ പ്രദേശവാസികളില്‍ നിന്ന് ടോള്‍ പിരിക്കാനുള്ള നീക്കം താല്‍ക്കാലികമായി നിര്‍ത്തി. നിലവിലെ സ്ഥിതി ഒരു മാസം വരെ തുടരാന്‍ ഞായറാഴ്ച ചേര്‍ന്ന യോഗത്തില്‍ തീരുമാനമായി.
അടുത്ത ഫെബ്രുവരി അഞ്ച് വരെ പ്രദേശവാസികളില്‍ നിന്നും ടോള്‍ പിരിക്കില്ല.വടക്കഞ്ചേരിയില്‍ പി പി സുമോദ് എംഎല്‍എയുടെ നേതൃത്വത്തില്‍ നടത്തിയ ചര്‍ച്ചയിലാണ് തീരുമാനം.
ട്രോള്‍ കമ്പനി അധികൃതര്‍ അഞ്ച് കിലോമീറ്റര്‍ പരിധിയില്‍ സൗജന്യം അനുവദിക്കാമെന്ന് അറിയിച്ചു.ബാക്കിയുള്ള പ്രദേശവാസികള്‍ക്ക് മാസ പാസ് എന്ന വ്യവസ്ഥയില്‍ തുടരാമെന്ന് ടോള്‍ കമ്പനി അറിയിച്ചെങ്കിലും തങ്ങള്‍ പണം നല്‍കി യാത്ര ചെയ്യില്ലെന്ന ഉറച്ച നിലപാടില്‍ ആയിരുന്നു പ്രദേശവാസികള്‍.
തുടര്‍ന്നാണ് അഞ്ച് പഞ്ചായത്തുകളിലെ നാല് ചക്രവാഹനങ്ങളുടെ കണക്കെടുക്കാനും എംപി ഉള്‍പ്പെടെയുള്ളവരുടെ സാന്നിധ്യത്തില്‍ അടുത്തമാസം 5 നകം ചര്‍ച്ച നടത്താനും തീരുമാനിച്ചത്.അഞ്ച് പഞ്ചായത്തുകളിലായി എത്ര നാലു ചക്ര വാഹനങ്ങള്‍ ടോള്‍ പ്ലാസ വഴി ഒരു മാസം കടന്നു പോകുന്നുവെന്ന കണക്ക് ജനുവരി 30 നകം വിദഗ്ധ സമിതിയുടെ നേതൃത്വത്തില്‍ എടുക്കും. ഇതിന് ശേഷമേ സൗജന്യമായി പോകേണ്ടവര്‍ ആരൊക്കെയെന്ന് കൃത്യമായ ഒരു ഡാറ്റ ശേഖരിക്കാന്‍ കഴിയൂവെന്ന് എംഎല്‍എ യോഗത്തില്‍ പറഞ്ഞു.
പ്രതികരിക്കാൻ ഇവിടെ എഴുതുക: