തിരുവനന്തപുരം: മാലിന്യമുക്തം നവകേരളം ജനകീയ ക്യാമ്പയിനിന്റെ ഭാഗമായി സംസ്ഥാനത്തെ മുഴുവന് വീടുകളിലെയും സ്ഥാപനങ്ങളിലെയും ജൈവമാലിന്യ സംസ്കരണ സംവിധാനങ്ങളുടെ ഗുണനിലവാരം വിലയിരുത്താനുള്ള സര്വേ തുടങ്ങി. ജൈവമാലിന്യ പരിപാലനത്തില് പരമാവധി ഉറവിട സംസ്കരണം ഉറപ്പാക്കുക, സാധ്യമാകാത്ത സ്ഥലങ്ങളില് കമ്മ്യൂണിറ്റി തലത്തില് ജൈവമാലിന്യ സംസ്കരണ സംവിധാനം സജ്ജീകരിക്കുക എന്നീ ലക്ഷ്യങ്ങളോടെയാണ് വിവരശേഖരണം നടത്തുന്നത്. സംസ്ഥാനത്താകെ ഏകദേശം 1,50,000 പേര് വിവരശേഖരണത്തിന്റെ ഭാഗമാകും.
ഹരിതകര്മ്മസേന, കുടുംബശ്രീ എഡിഎസ്, സിഡിഎസ്, ഓക്സിലറി ഗ്രൂപ്പ് അംഗങ്ങള് എന്നിവരെ ഉള്പ്പെടുത്തി ഓരോ വാര്ഡിലും രണ്ട് മുതല് മൂന്ന് വരെ സംഘങ്ങളായാണ് വിവരശേഖരണം നടത്തുന്നത്. അതത് കേന്ദ്രങ്ങളിലെ തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തില് ഹരിതമിത്രം ആപ്ലിക്കേഷന് ഉപയോഗിച്ചാണ് വിവരശേഖരണ പ്രവര്ത്തനങ്ങള് നടക്കുക. ഹരിതമിത്രം ആപ്ലിക്കേഷനില് രജിസ്റ്റര് ചെയ്യാത്ത വീടുകളേയും സ്ഥാപനങ്ങളേയും ചേര്ക്കുന്ന പരിപാടിയും ഇതോടൊപ്പം നടത്തും.
