തിരുവനന്തപുരം: ചൂരല്മല, മുണ്ടക്കൈ, പുഞ്ചിരിമറ്റം വാര്ഡുകളിലെ ഉരുള്പൊട്ടല് ദുരന്തബാധിതരുടെ പുനരധിവാസം ചര്ച്ച ചെയ്യാന് 100ല് താഴെ വീടുകള് സ്പോണ്സര് ചെയ്തവരുടെ യോഗം മുഖ്യമന്ത്രി പിണറായി വിജയന്റെ അധ്യക്ഷതയില് ചേര്ന്നു. എന്നാല് എത്ര വീടുകള് എന്നത് വ്യക്തമാക്കാന് സ്പോണ്സര്മാര് തയ്യാറായില്ല.
ചെലവുകള് വിലയിരുത്തി പരമാവധി സഹായം നല്കുമെന്ന് മാത്രമാണ് അവര് അറിയിച്ചത്. വീടു നിര്മ്മാണത്തിന്റെ ചെലവ് ആദ്യം പറഞ്ഞ 16 ലക്ഷത്തില് നിന്ന് 30 ലക്ഷമായി സര്ക്കാര് ഉയര്ത്തിയ സാഹചര്യത്തിലാണ് വ്യക്തമായ എണ്ണം പറയാന് സ്പോണ്സര്മാര്ക്ക് കഴിയാതെ പോയത്.
സ്പോണ്സര്ഷിപ്പുമായി ബന്ധപ്പെട്ട വിവരങ്ങള് ഉള്ക്കൊള്ളിച്ച് വെബ്പോര്ട്ടല് തയ്യാറാക്കുമെന്ന് സര്ക്കാര് യോഗത്തെ അറിയിച്ചു. നിലവിലുള്ള സ്പോണ്സര്മാരുടെ വിവരങ്ങളും ഭാവി സ്പോണ്സര്മാര്ക്കുള്ള ഓപ്ഷനുകളും അതില് ലഭ്യമാക്കും. ഓരോ സ്പോണ്സര്ക്കും സവിശേഷമായ സ്പോണ്സര് ഐഡി നല്കും. ഓണ്ലൈന് പെയ്മെന്റ് ഓപ്ഷനും ഉണ്ടാകും. സ്പോണ്സര്മാര്ക്ക് സര്ട്ടിഫിക്കറ്റും മറ്റ് അംഗീകാരങ്ങളും നല്കും. സ്പോണ്സര്ഷിപ്പ് മാനേജ്മെന്റിനായി പ്രത്യേക യൂണിറ്റ് ഉണ്ടാകും. ഇതിനുവേണ്ടി ഒരു സ്പെഷ്യല് ഓഫീസറെ നിയമിക്കും.
