ഇടുക്കി: കുമളി ബസ് സ്റ്റാന്‍ഡില്‍ ഭാര്യയുമായുളള ബന്ധത്തെ ചൊല്ലിയുളള തര്‍ക്കത്തെ തുടര്‍ന്ന് ഭര്‍ത്താവ് ഓട്ടോഡ്രൈവറെ കുത്തി പരിക്കേല്‍പ്പിച്ചു. കുത്തേറ്റ ചെങ്കര സ്വദേശി സുനിലിനെ തേനി മെഡിക്കല്‍ കോളേജില്‍ പ്രവേശിപ്പിച്ചു. കുത്തിയ ചെങ്കര സ്വദേശി, തമിഴ്‌നാട് കമ്പത്ത് താമസക്കാരനായ മഹേശ്വരനെ പൊലീസ് അറസ്റ്റ് ചെയ്തു.
കുമളി ബസ് സ്റ്റാന്‍ഡില്‍ വച്ച് രാവിലെയാണ് ചെങ്കര സ്വദേശി പുതുക്കാട്ടില്‍ സുനിലിനെ ചെങ്കര സ്വദേശിയായ മഹേശ്വരന്‍ കുത്തി പരിക്കേല്‍പ്പിച്ചത്. സുനിലിന് കഴുത്തിനും നെഞ്ചിനും കൈക്കും പരിക്കേറ്റു.
മഹേശ്വരനും ഭാര്യയും അകന്ന് കഴിയുകയാണ്. മഹേശ്വരന്റെ ഭാര്യയും ഓട്ടോ ഡ്രൈവറായ സുനിലും തമ്മിലുള്ള ബന്ധത്തെച്ചൊല്ലിയുള്ള വാക്കേറ്റമാണ് കത്തിക്കുത്തില്‍ എത്തിയത്.മുന്‍പും ഈ പ്രശ്‌നത്തില്‍ ഇരുവരും തമ്മില്‍ വാക്കേറ്റവും കയ്യാങ്കളിയും ഉണ്ടായിട്ടുണ്ട്. പ്രശ്‌നം പറഞ്ഞ് തീര്‍ക്കാനാണ് വെളളിയാഴ്ച രണ്ട് പേരും കുമളിയിലെത്തിയത്. വാക്കേറ്റം കയ്യാങ്കളിയിലെത്തിയതോടെ കൈവശം കരുതിയിരുന്ന കത്തി വച്ച് മഹേശ്വരന്‍ സുനിലിനെ കുത്തുകയായിരുന്നു.
കണ്ടു നിന്നവര്‍ ഏറെ പണിപ്പെട്ടാണ് മഹേശ്വരനെ പിടികൂടി പൊലീസിന് കൈമാറിയത്. പരിക്കേറ്റ സുനിലിനെ കുമളി സര്‍ക്കാര്‍ അശുപത്രിയിലെത്തിച്ച് പ്രാഥമിക ശുശ്രൂഷ നല്‍കിയ ശേഷം തേനി മെഡിക്കല്‍ കോളേജ് ആശുപത്രിയിലേക്ക് മാറ്റി.
പ്രതികരിക്കാൻ ഇവിടെ എഴുതുക: