ന്യൂദല്‍ഹി : യമന്‍ പൗരനെ കൊല ചെയ്‌തെന്ന കേസില്‍ വധശിക്ഷയ്‌ക്ക് വിധിക്കപ്പെട്ട് ജയിലില്‍ കഴിയുന്ന മലയാളി യുവതി നിമിഷപ്രിയയുടെ ശിക്ഷാ ഇളവിനായി ഇടപെടലിന് തയാറെന്ന് ഇറാന്‍.മാനുഷിക പരിഗണന എന്ന നിലയിലുളള ഇടപെടല്‍ നടത്താന്‍ തയാറാണെന്ന് മുതിര്‍ന്ന ഇറാന്‍ വിദേശകാര്യ ഉദ്യോഗസ്ഥന്‍ അറിയിച്ചു.
ഇറാന്‍ വിദേശകാര്യ സഹമന്ത്രി ഡോ തഖ്ത് റവഞ്ചിയുടെ ഇന്ത്യ സന്ദര്‍ശത്തിനിടെയാണ് ഇക്കാര്യം വെളിപ്പെടുത്തിയത്.നിമിഷപ്രിയയുടെ വധശിക്ഷ നടപ്പാക്കാന്‍ യമന്‍ പ്രസിഡന്റ് കഴിഞ്ഞ ദിവസം അനുമതി നല്‍കിയിരുന്നു.
നിമിഷപ്രിയയുടെ മോചനത്തിനായി പോയ അമ്മ പ്രേമകുമാരി ഇപ്പോഴും യമനില്‍ തുടരുകയാണ്. കേസിനാധാരമായ സംഭവം 2017ലായിരുന്നു. യമന്‍ പൗരന്‍ തലാല്‍ അബ്ദുല്‍ മഹ്ദിയെ കൊലപ്പെടുത്തിയെന്ന കേസിലാണ് നിമിഷപ്രിയയ്ക്ക് വധശിക്ഷ വിധിച്ചത്.2018ലായിരുന്നു നിമിഷപ്രിയയ്ക്ക് യമന്‍ കോടതി വധശിക്ഷ വിധിച്ചത്. അപ്പീല്‍ നല്‍കിയെങ്കിലും 2020ല്‍ യമനിലെ അപ്പീല്‍ കോടതി ശിക്ഷ ശരിവെച്ചു. പിന്നീട്, യമനിലെ സുപ്രീം കോടതിയെ സമീപിച്ചെങ്കിലും 2023 നവംബറില്‍ അപ്പീല്‍ തള്ളി.
കൊല്ലപ്പെട്ട വ്യക്തിയുടെ ബന്ധുക്കള്‍ക്ക് ചോരപ്പണം നല്‍കി ശിക്ഷാ ഇളവിനുളള സാധ്യത മാത്രമാണ് ഇനിയുളളത്. ഇതിനുളള ആദ്യ ഘട്ടം ചര്‍ച്ചകള്‍ നടന്നെങ്കിലും മുന്നോട്ട് പോയിരുന്നില്ല.
പ്രതികരിക്കാൻ ഇവിടെ എഴുതുക: