ന്യൂദല്‍ഹി: അന്തരിച്ച മുന്‍പ്രധാനമന്ത്രി ഡോ. മന്‍മോഹന്‍ സിങ്ങിനു സ്മാരകം നിര്‍മിക്കാന്‍ സ്ഥലം നല്കുന്നില്ലെന്ന് അനവസരത്തില്‍ ആരോപിച്ച് കോണ്‍ഗ്രസ് നാണംകെട്ടു. സ്മാരകത്തിന് പ്രത്യേക സ്ഥലം അനുവദിക്കണമെന്ന അഭ്യര്‍ത്ഥന ലഭിച്ച് മണിക്കൂറുകള്‍ക്കകം ഇതു സംബന്ധിച്ച ഉറപ്പ് കേന്ദ്ര ആഭ്യന്തര മന്ത്രി നേരിട്ടു കോണ്‍ഗ്രസ് അധ്യക്ഷനു കൊടുത്തിട്ടും നേതാക്കള്‍ രാഷ്‌ട്രീയ വിവാദത്തിനു ശ്രമിച്ചു. പ്രത്യേക സ്ഥലം അനുവദിക്കുന്നതിനു തടസമായത് 2013ല്‍ യുപിഎ സര്‍ക്കാര്‍ ഭരണകാലത്തെടുത്ത തീരുമാനമെന്നതും കോണ്‍ഗ്രസിനു തിരിച്ചടിയായി.
2013ല്‍ രണ്ടാം യുപിഎ സര്‍ക്കാര്‍ കാലത്ത് പ്രധാനമന്ത്രിയായിരുന്ന ഡോ. മന്‍മോഹന്‍ സിങ്ങിന്റെ അധ്യക്ഷതയില്‍ ചേര്‍ന്ന കേന്ദ്ര മന്ത്രിസഭാ യോഗമാണ് ദല്‍ഹി ഏകതാസ്ഥല്‍ സമാധി കോംപ്ലക്സില്‍ രാഷ്‌ട്രീയ സ്മൃതി നിര്‍മിക്കാന്‍ തീരുമാനിച്ചത്. രാഷ്‌ട്രപതി, പ്രധാനമന്ത്രി, ഉപരാഷ്‌ട്രപതി, മുന്‍പ്രധാനമന്ത്രിമാര്‍, രാഷ്‌ട്രപതിമാര്‍, ഉപരാഷ്‌ട്രപതിമാര്‍ തുടങ്ങിയവര്‍ക്കു സ്മാരകം നിര്‍മിക്കാന്‍ വെവ്വേറെ സ്ഥലം അനുവദിക്കാതെ രാഷ്‌ട്രീയ സ്മൃതിയില്‍ വിവിധ ഇടങ്ങളിലായി സ്മാരകമെന്നതായിരുന്നു യുപിഎ തീരുമാനം. എന്നാല്‍ നരസിംഹ റാവു അടക്കമുള്ള മുന്‍പ്രധാനമന്ത്രിമാര്‍ക്കു കോണ്‍ഗ്രസ് സര്‍ക്കാര്‍ ഇവിടെ സ്മാരകത്തിനു സ്ഥലം അനുവദിച്ചില്ല.
പ്രധാനമന്ത്രി മോദി അധികാരത്തിലെത്തിയ ശേഷമാണ് നരസിംഹ റാവുവിനു സ്മാരകം നിര്‍മിക്കാന്‍ തീരുമാനിച്ചത്. 2015ല്‍ റാവുവിന് ഏകതാസ്ഥലില്‍ സ്മാരകമുയര്‍ന്നു. 2018ല്‍ അടല്‍ ബിഹാരി വാജ്പേയി അന്തരിച്ചപ്പോഴും രാഷ്‌ട്രീയ സ്മൃതിയിലാണ് സംസ്‌കരിച്ചതും സ്മാരകം നിര്‍മിച്ചതും. എന്നാല്‍ മന്‍മോഹന്‍ സിങ്ങിനു പ്രത്യേക സ്മാരകം വേണമെന്നും അതിനായി വേറെ സ്ഥലം അനുവദിക്കണമെന്നും കോണ്‍ഗ്രസ് ആവശ്യപ്പെട്ടതു തന്നെ വിവാദം ലക്ഷ്യമിട്ടാണെന്നുറപ്പായിരുന്നു.
കേന്ദ്ര സര്‍ക്കാര്‍ അക്കാര്യത്തിലും അനുഭാവ തീരുമാനമെടുത്തതോടെ വിവാദമുണ്ടാക്കാനുള്ള കോണ്‍ഗ്രസ് ശ്രമം ദയനീയമായി പരാജയപ്പെട്ടു. മന്‍മോഹന്‍ സിങ്ങിനു കേന്ദ്ര സര്‍ക്കാര്‍ നല്കിയ ആദരവും ഏറെ ശ്രദ്ധേയമായി. 2004 ഡിസംബറില്‍ പി.വി നരസിംഹ റാവുവിന്റെ ഭൗതികദേഹത്തോടു കോണ്‍ഗ്രസും സോണിയ ഗാന്ധിയും കാണിച്ച അവഗണനയും ക്രൂരതയും ഒരിക്കല്‍ക്കൂടി ചര്‍ച്ചയുമായി.
കേന്ദ്ര സര്‍ക്കാര്‍ വെള്ളിയാഴ്ച രാത്രി പുറത്തിറക്കിയ പ്രസ്താവന
മുന്‍പ്രധാനമന്ത്രി ഡോ. മന്‍മോഹന്‍ സിങ്ങിനു സ്മാരകം നിര്‍മിക്കാന്‍ സ്ഥലം അനുവദിക്കണമെന്നാവശ്യപ്പെട്ടുള്ള അപേക്ഷ കോണ്‍ഗ്രസ് അധ്യക്ഷനില്‍ നിന്ന് ഇന്നു രാവിലെ ലഭിച്ചു.
കേന്ദ്ര മന്ത്രിസഭാ യോഗ ശേഷം അടിയന്തരമായി കേന്ദ്ര ആഭ്യന്തര മന്ത്രി അമിത് ഷാ മല്ലികാര്‍ജ്ജുന്‍ ഖാര്‍ഗെയെ വിളിക്കുകയും സ്മാരകത്തിനു കേന്ദ്ര സര്‍ക്കാര്‍ സ്ഥലം അനുവദിക്കുന്നുണ്ടെന്ന് അറിയിക്കുകയും ചെയ്തു. ഡോ. മന്‍മോഹന്‍ സിങ്ങിന്റെ സംസ്‌കാര ചടങ്ങുകള്‍ പൂര്‍ത്തിയായിക്കഴിഞ്ഞ് ട്രസ്റ്റ് രൂപീകരിച്ചു സ്മാരകത്തിനുള്ള ഭൂമി അനുവദിക്കും.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: