ഡെറാഡൂണ്(ഉത്തരാഖണ്ഡ്): ആയുര്വേദത്തിന് കൃത്യമായ ആധികാരിക തെളിവുകളുടെ പിന്ബലമുണ്ടെന്ന് ലോക ആയുര്വേദ കോണ്ഗ്രസില് പങ്കെടുത്ത വിദഗ്ധര്. ആധികാരികമായ തെളിവില്ലാത്തതിനാല് ആയുര്വേദം ശാസ്ത്രീയമല്ലെന്ന മിഥ്യാധാരണ മറികടക്കാനുളള മാര്ഗമാണ് തെളിവ് അടിസ്ഥാനപ്പെടുത്തിയുള്ള ചികിത്സാ സംവിധാനമെന്ന് ഡെറാഡൂണില് ആയുര്വേദ കോണ്ഗ്രസില് പങ്കെടുത്ത് സംസാരിച്ച വിദഗ്ധര് ജന്മഭൂമിയോടു സംസാരിക്കവെ അഭിപ്രായപ്പെട്ടു.
ലോകത്തിലെ തന്നെ ഏറ്റവും വലിയ ചികിത്സാ പദ്ധതിയായി ആയുര്വേദം മാറുമെന്ന് കേരള ആരോഗ്യ സര്വകലാശാല വൈസ് ചാന്സലര് ഡോ. മോഹന് കുന്നുമ്മേല് പറഞ്ഞു. ആയുര്വേദത്തെ ഇന്ന് ശാസ്ത്രത്തിന്റെ അടിസ്ഥാനത്തില് വിലയിരുത്തുന്നു. ലോക ആയുര്വേദ കോണ്ഗ്രസ് അടക്കമുള്ളവ ആയുര്വേദത്തെ ആഗോള തലത്തിലേക്ക് ഉയര്ത്തുന്നതിന്റെ ഭാഗമാണെന്നും അദ്ദേഹം കൂട്ടിച്ചേര്ത്തു.
ആയുര്വേദം വര്ഷങ്ങളുടെ പരിശീലനത്തിലൂടെ ആര്ജ്ജിച്ചെടുത്തതാണെന്ന് അദ്ദേഹം ചൂണ്ടിക്കാട്ടി. ആയിരക്കണക്കിന് വര്ഷങ്ങളായിട്ടും അത് നിലനില്ക്കുന്നുവെന്നത് തന്നെ മികച്ച തെളിവാണ്.
പുതിയ മരുന്നുകളിലും ചികിത്സകളിലും ക്ലിനിക്കല് പരീക്ഷണങ്ങള് നടത്തി ആയുര്വേദം ആധികാരികമെന്ന് തെളിയിക്കാമെന്നും അതിന്റെ ഫലങ്ങള് മേഖലയുമായി ബന്ധപ്പെട്ട ജേണലുകളിലും പോര്ട്ടലുകളിലും പ്രസിദ്ധീകരിച്ച് ആയുര്വേദ പങ്കാളികളിലേയ്ക്ക് എത്തിക്കാനാകുമെന്ന നിര്ദേശവും പാനലിസ്റ്റുകള് മുന്നോട്ട് വച്ചു. ആയുര്വേദ ഡോക്ടര്മാര് തങ്ങളുടെ ഡോക്യുമെന്റേഷന് കഴിവുകള് മെച്ചപ്പെടുത്തണമെന്നും ആയുര്വേദ ക്ലിനിക്കല് ഇ-ലേണിങ് (ആയുര്സെല്) പോലുള്ള വെബ് പ്ലാറ്റ്ഫോമുകളില് വിശദമായ അന്വേഷണ പഠനങ്ങള് രേഖപ്പെടുത്താന് പരിശ്രമിക്കണമെന്നും അഭിപ്രായമുയര്ന്നു.
അതേസമയം കഴിഞ്ഞ 40 വര്ഷത്തിനിടയില് 300 ആയുര്വേദ അന്വേഷണ പഠനങ്ങള് രേഖപ്പെടുത്തിയപ്പോള്, കഴിഞ്ഞ ഒന്നര വര്ഷത്തിനിടയില് മാത്രം നൂറിലധികം പഠനങ്ങള് ആയുര്സെല്ലില് പോസ്റ്റ് ചെയ്യപ്പെട്ടു എന്നത് ശുഭസൂചനയാണെന്നും അഭിപ്രായമുയര്ന്നു. ആശയങ്ങള്ക്ക് തെളിച്ചമുണ്ടാകുന്നതിന് ആധികാരിക തെളിവുകള് ആവശ്യമാണെന്ന് സാവിത്രിഭായ് ഫുലെ പൂനൈ യൂണിവേഴ്സിറ്റിയിലെ ഡോ. ഗിരീഷ് ടില്ലു ചൂണ്ടിക്കാട്ടി. കൃത്യമായ തെളിവുകള് അടിസ്ഥാനമാക്കിയുള്ളത് എപ്പോഴും യുക്തിസഹമായിരിക്കുമെന്നും അദ്ദേഹം പറഞ്ഞു.
തെളിവ് അടിസ്ഥാനപ്പെടുത്തിയുള്ള ഒരു സംവിധാനത്തില് തെളിവ് എന്താണെന്നും അത് ആയുര്വേദത്തിന് എങ്ങനെ പ്രസക്തമാകുന്നു എന്നതിലും ആയുര്വേദ പങ്കാളികള് യോജിപ്പിലെത്തേണ്ടത് പ്രധാനമാണെന്ന് ലക്നൗ യൂണിവേഴ്സിറ്റിയിലെ ആയുര്വേദ ഫാക്കല്റ്റിയായ ഡോ. സഞ്ജീവ് റസ്തോഗി അഭിപ്രായപ്പെട്ടു. ആയുര്വേദം എപ്പോഴും ആധികാരിക തെളിവുകള് അടിസ്ഥാനമാക്കിയുള്ള ചികിത്സാ സമ്പ്രദായമാണെന്ന് പറഞ്ഞ അദ്ദേഹം പാരമ്പര്യ ഗ്രന്ഥങ്ങളില് രേഖപ്പെടുത്തിയിരിക്കുന്ന തെളിവുകളും ക്ലിനിക്കല് പരിശീലനത്തിലൂടെ ഡോക്ടര് വ്യക്തിപരമായി ആര്ജ്ജിച്ച അനുഭവങ്ങളുമാണ് ആയുര്വേദ ചികിത്സയെ മുന്നോട്ട് നയിക്കുന്നതെന്ന് പറഞ്ഞു. അതേസമയം ആധുനിക വൈദ്യശാസ്ത്രം പാഠപുസ്തകങ്ങളെ അടിസ്ഥാനമാക്കിയുള്ളതാണെന്നും അവിടെ പരിശീലനത്തിന് പ്രാധാന്യം കുറവാണെന്നും ചൂണ്ടിക്കാട്ടിയ അദ്ദേഹം ആധുനിക വൈദ്യശാസ്ത്രത്തിനാണ് മാറ്റം വരേണ്ടതെന്നും വാദിച്ചു.
ചികിത്സാ രീതികള് ആധികാരികത അടിസ്ഥാനമാക്കിയുള്ളതായിരിക്കണമെന്ന് ആയുഷ് മന്ത്രാലയത്തിലെ ഡോ. ഭൂഷണ് പട്വര്ധന് പറഞ്ഞു. ഏത് ചികിത്സാ രീതികളും തെളിവുകളില് അധിഷ്ഠിതമായിരിക്കണം. എന്തുകൊണ്ടാണ് ഒരു ചികിത്സ വിജയിച്ചതെന്ന് നിങ്ങള്ക്ക് വിശദീകരിക്കാന് കഴിയുന്നില്ലെങ്കില് അത് യാദൃച്ഛികമായി സംഭവിച്ചതായി കണക്കാക്കപ്പെടുമെന്നും അദ്ദേഹം പറഞ്ഞു.
