ന്യൂദൽഹി : രാജ്യത്തെ മുഴുവൻ തങ്ങളുടെ കുടുംബമായാണ് ബിജെപി കണക്കാക്കുന്നതെന്നും എന്നാൽ ഒരു കുടുംബം അതിന്റെ പ്രയോജനത്തിനായി രാജ്യത്തെ മുഴുവൻ കാൽക്കീഴിൽ നിർത്തുകയാണെന്നും കോൺഗ്രസിനെതിരെ തുറന്നടിച്ച് പ്രതിരോധമന്ത്രി രാജ്നാഥ് സിംഗ്. സമൂഹത്തിനു വേണ്ടിയുള്ള മാതൃകാപരമായ സേവനം നടത്തിയ പ്രമുഖരെ അഭിനന്ദിക്കുന്നതിനായി ദൽഹിയിൽ സേവാഭാരതി സംഘടിപ്പിച്ച പരിപാടിയിൽ സംസാരിക്കുകയായിരുന്നു കേന്ദ്രമന്ത്രി.
പ്രധാനമന്ത്രി നരേന്ദ്രമോദി ജനങ്ങളെ അഭിസംബോധന ചെയ്യുമ്പോൾ പരിവാർജനോ’ (എന്റെ കുടുംബാംഗങ്ങൾ) എന്ന് ആവർത്തിച്ച് പറയുന്നത് നിങ്ങൾ ശ്രദ്ധിച്ചിരിക്കണം. ഞങ്ങൾ രാജ്യത്തെ മുഴുവൻ ഞങ്ങളുടെ കുടുംബമായി കണക്കാക്കുന്നു, അതേസമയം ഒരു കുടുംബത്തിന്റെ നേട്ടത്തിനായി രാജ്യത്തെ മുഴുവൻ നേതാക്കളുടെ കാൽക്കൽ നിർത്തിയ ചിലരുണ്ടെന്ന് അദ്ദേഹം കോൺഗ്രസിനെയും നെഹ്‌റു-ഗാന്ധി കുടുംബത്തെയും പരോക്ഷമായി പരാമർശിച്ചുകൊണ്ട് പറഞ്ഞു. ഇവിടെയാണ് ഇരു പാർട്ടികളും തമ്മിലുള്ള വ്യത്യാസം മനസ്സിലാക്കേണ്ടതെന്നും അദ്ദേഹം ചൂണ്ടിക്കാട്ടി.
പ്രധാനമന്ത്രി മോദിയുടെ നേതൃത്വത്തിലുള്ള കേന്ദ്ര സർക്കാർ ജനങ്ങളുടെ ക്ഷേമത്തിനും രാജ്യത്തിന്റെ സർവതോന്മുഖമായ പുരോഗതിക്കുമായി സേവന ബോധത്തോടെ പ്രവർത്തിക്കുന്നുണ്ടെന്ന് സിംഗ് പറഞ്ഞു. ഞങ്ങളുടെ വഴികാട്ടിയായ പണ്ഡിറ്റ് ദീൻദയാൽ ഉപാധ്യായ അന്ത്യോദയയുടെ സന്ദേശവും സമഗ്രമായ മാനവികതയുടെ തത്ത്വചിന്തയും ഞങ്ങൾക്ക് നൽകി. കൂടാതെ പുരോഗതി സമൂഹത്തിലെ അവസാനത്തെ വ്യക്തിയിലും എത്തുന്ന സമയം വരെ തങ്ങൾ പ്രവർത്തനം നടത്തുമെന്നും അദ്ദേഹം കൂട്ടിച്ചേർത്തു.
ഇതിനു പുറമെ പണ്ഡിറ്റ് ദീൻ ദയാൽ ഉപാധ്യായയുടെ ചിന്തയിൽ നിന്ന് പ്രചോദനം ഉൾക്കൊണ്ട് 2014ൽ കേന്ദ്രത്തിൽ അധികാരമേറ്റ ഉടൻ തന്നെ തന്റെ സർക്കാർ രാജ്യത്തെ പാവപ്പെട്ട ജനങ്ങൾക്ക് വേണ്ടി സമർപ്പിക്കപ്പെട്ടതാണെന്ന് പ്രധാനമന്ത്രി മോദി പറഞ്ഞതായി സിംഗ് പറഞ്ഞു. സ്വതന്ത്ര ഇന്ത്യയിൽ ആദ്യമായി 25 കോടി ജനങ്ങൾ ദാരിദ്ര്യരേഖയിൽ നിന്ന് വളരെ വേഗത്തിൽ കരകയറിയത് ഈ സർക്കാർ സ്വീകരിച്ച നടപടികളുടെ ഫലമാണെന്നും അദ്ദേഹം കൂട്ടിച്ചേർത്തു.
സമൂഹത്തിൽ ഇപ്പോഴും ദാരിദ്ര്യം, നിരക്ഷരത, വിവേചനം, മറ്റ് വെല്ലുവിളികൾ എന്നിവ നേരിടുന്ന വിവിധ വിഭാഗങ്ങളുണ്ടെന്ന് സിംഗ് പറഞ്ഞു. അവരുടെ ഉന്നമനത്തിനായി ഒന്നിച്ച് പ്രവർത്തിക്കേണ്ടത് നമ്മുടെ ഉത്തരവാദിത്തമാണെന്നും അദ്ദേഹം കൂട്ടിച്ചേർത്തു.
പ്രതികരിക്കാൻ ഇവിടെ എഴുതുക: