സന്നിധാനം: ശബരിമലയില് ആദ്യമായി സ്ഥാപിച്ച മൂന്ന് മഴമാപിനികള് മേഖലയില് ലഭിക്കുന്ന മഴയുടെ അളവ് കൃത്യമായി അറിയാനും അതിനനുസരിച്ച് മുന്കരുതല് സ്വീകരിക്കാനും അധികൃതര്ക്കു സഹായകമാകുന്നു. മണ്ഡലകാലം തുടങ്ങിയ നവംബര് 15 നാണ് സന്നിധാനത്തും നിലയ്ക്കലും പമ്പയിലുമായി സംസ്ഥാന ദുരന്തനിവാരണ അതോറിറ്റി വിഭാഗവും ജില്ലാ ദുരന്തനിവാരണ അതോറിറ്റി വിഭാഗവും സംയുക്തമായി മഴ മാപിനി സ്ഥാപിച്ചത്.
സന്നിധാനത്ത് പാണ്ടിത്താവളത്തിലും പമ്പയില് പോലീസ് മെസിന് സമീപവുമാണ് മഴമാപിനികളുള്ളത്. മൂന്ന് മണിക്കൂര് ഇടവിട്ട് ഈ മൂന്ന് ബേസ് സ്റ്റേഷനുകളില് നിന്നും മഴയുടെ അളവ് എടുക്കുന്നതിനാല് ശബരിമലയില് പെയ്യുന്ന മൊത്തം മഴയുടെ കണക്ക് കൃത്യമായി ലഭിക്കും. ഒരു ദിവസത്തെ മഴയുടെ അളവ് കണക്കാക്കുന്നത് അന്താരാഷ്ട്ര മാനദണ്ഡങ്ങള് അനുസരിച്ച് രാവിലെ 8.30 മുതല് പിറ്റേന്ന് രാവിലെ 8.30 വരെയാണ്.
ഇതുവരെയുള്ള കണക്കെടുത്താല് സന്നിധാനത്ത് ഏറ്റവും കൂടുതല് മഴ രേഖപ്പെടുത്തിയത് ഡിസംബര് 13 പുലര്ച്ചെ 5.30-നാണ്. 27 മില്ലിമീറ്റര്. ഇതേ ദിവസം, ഇതേ സമയം പെയ്ത 24.2 മില്ലിമീറ്റര് മഴയാണ് പമ്പയിലെ ഏറ്റവും കൂടിയ മഴ. മഴയുടെ അളവെടുക്കാനുള്ള സന്നിധാനത്തെ എമര്ജന്സി ഓപ്പറേഷന് സെന്ററില് (ഇഒസി) ഏഴു പേരും പമ്പയില് ആറു പേരും നിലയ്ക്കലില് ആറു പേരും 24 മണിക്കൂറും ഷിഫ്റ്റ് അടിസ്ഥാനത്തില് ജോലി ചെയ്യുന്നു. ഇതിനു പുറമേ കളക്ടറേറ്റില് രണ്ടു പേരുമുണ്ട്.
പത്തനംതിട്ട ജില്ലാ കളക്ടറുടെ കീഴില് എഡിഎം അരുണ് എസ.് നായരുടെ നേതൃത്വത്തില് മഴയുടെ അളവ് ദിവസവും നിരീക്ഷിക്കുന്നു. ശബരിമലയില് പെയ്യുന്ന മഴ കൃത്യമായി രേഖപ്പെടുത്താന് ഇതുവരെ സംവിധാനങ്ങള് ഉണ്ടായിരുന്നില്ല. മുന്പ് ആശ്രയിച്ചിരുന്നത് സീതത്തോടിലെ വെതര് സ്റ്റേഷനെയായിരുന്നു. മഴയുടെ അളവ്കൃത്യമായി ലഭിക്കുന്നത് പ്രതികൂല കാലാവസ്ഥയില് മുന്കരുതല് നടപടി സ്വീകരിക്കാന് വളരെ ഉപകാരപ്രദമാണെന്ന് എഡിഎം അരുണ് എസ്. നായര് പറഞ്ഞു.
