തൃശൂര്‍: കോണ്‍ഗ്രസില്‍ ഉള്‍പ്പോരുകളും തൊഴുത്തില്‍ കുത്തും തുടരവെ എം കെ രാഘവന്‍ എം പി രമേശ് ചെന്നിത്തലയുമായി കൂടിക്കാഴ്ച നടത്തി. തൃശൂര്‍ രാമനിലയത്തിലായിരുന്നു കൂടിക്കാഴ്ച.
കണ്ണൂര്‍ മാടായി കോളേജിലെ നിയമനം വിവാദമായിരിക്കെയാണ് ചര്‍ച്ച എന്നത് ശ്രദ്ധേയമാണ്.മറ്റ് പരിപാടികള്‍ ഇല്ലാതിരുന്നിട്ടും എം കെ രാഘവന്‍ എം പി രാവിലെ മുതല്‍ തൃശൂര്‍ രാമനിലയത്തില്‍ തന്നെ തുടരുകയായിരുന്നു.ഉച്ചയോടെയാണ് രാമനിലയത്തിലേക്ക് രമേശ് ചെന്നിത്തല എത്തിയത്. രമേശ് ചെന്നിത്തലയുടെ മുറിയില്‍ വച്ചായിരുന്നു ഇരുവരുടെയും കൂടിക്കാഴ്ച.
ഇവര്‍ രണ്ടുപേരും മാത്രമായി ബാല്‍ക്കണിയില്‍ വച്ച് അരമണിക്കൂറോളം നേരം സംസാരിച്ചു.എന്നാല്‍ എം കെ രാഘവനുമായുള്ളത് രഹസ്യ കൂടിക്കാഴ്ചയല്ലെന്നും തന്റെ സഹപ്രവര്‍ത്തകനെ കാണുന്നതില്‍ എന്താണ് തെറ്റെന്നും കൂടിക്കാഴ്ചയ്‌ക്ക് ശേഷം രമേശ് ചെന്നിത്തല പ്രതികരിച്ചു.
എം കെ രാഘവന്‍ എം പി പാര്‍ട്ടിക്ക് വലിയ അസറ്റാണെന്ന് പറഞ്ഞ രമേശ് ചെന്നിത്തല മാടായി കോളേജ് നിയമന വിവാദം പാര്‍ട്ടിയുടെ മൂന്നംഗ സമിതി അന്വേഷിച്ചശേഷം തുടര്‍നടപടി സ്വീകരിക്കുമെന്നും പറഞ്ഞു. മാടായി കോളേജ് നിയമന വിവാദത്തില്‍ പരസ്യപോര് അവസാനിപ്പിക്കാന്‍ കഴിഞ്ഞ ദിവസം പാര്‍ട്ടി നേതൃത്വം നിര്‍ദേശിച്ചിരുന്നു. എന്നാല്‍ അണിയറയില്‍ ഇപ്പോഴും വിവാദം പുകയുന്നുണ്ടെന്നാണ് വിവരം. വി ഡി സതീശനെതിരെ കോണ്‍ഗ്രസില്‍ ചേരി ശക്തിപ്പെടുന്നുവെന്ന് വാര്‍ത്തകളുടെ കൂടി പശ്ചാത്തലത്തിലാണ് എം കെ രാഘവന്‍ – രമേശ് ചെന്നിത്തല ചര്‍ച്ച നടന്നത്.
എം കെ രാഘവന്റെ നിയന്ത്രണത്തിലുളള സമിതിയാണ് മാടായി കോളേജിനെ നിയന്ത്രിക്കുന്നത്.ഇവിടെ രാഘവന്റെ ബന്ധുവായ സി പി എം പ്രവര്‍ത്തകനെ നിയമിച്ചെന്നാരോപിച്ച് വലിയ പ്രതിഷേധമാണ് കോണ്‍ഗ്രസിലെ ഒരു വിഭാഗം നടത്തുന്നത്. രാഘവന്‍ പണം വാങ്ങിയാണ് നിയമനം നടത്തിയതെന്നാണ് ആരോപണം.
പ്രതികരിക്കാൻ ഇവിടെ എഴുതുക: