തിരുവനന്തപുരം: വിവരാവകാശ കമ്മിഷന്‍ കൊച്ചിയില്‍ നടത്തിയ തെളിവെടുപ്പില്‍ പങ്കെടുക്കാതിരുന്ന മഹാത്മാഗാന്ധി സര്‍വ്വകലാശാല രജിസ്ട്രാര്‍ക്കും കളമശ്ശേരി നഗരസഭ സെക്രട്ടറിക്കും കമ്മിഷന്റെ സമന്‍സ്.
രജിസ്ട്രാര്‍ അയച്ച പകരക്കാരനെ തിരിച്ചയച്ചു. നഗരസഭയിലെ വിവരാധികാരിക്കും സമന്‍സുണ്ട്. ഇവര്‍ ഈ മാസം 19 നും 21 നും തിരുവനന്തപുരത്ത് കമ്മിഷന്‍ ആസ്ഥാനത്ത് നേരില്‍ ഹാജരാകണം.ഇല്ലെങ്കില്‍ വാറണ്ട് അയച്ച് ഹാജര്‍ ഉറപ്പുവരുത്തുമെന്ന് സംസ്ഥാന വിവരാവകാശ കമ്മിഷണര്‍ ഡോ. എ. അബ്ദുല്‍ ഹക്കീം പറഞ്ഞു.
എറണാകുളം ഗസ്റ്റ് ഹൗസില്‍ ക്യാമ്പ് സിറ്റിംഗ് നടത്തുകയായിരുന്നു അദ്ദേഹം. സഹകരണ സംഘങ്ങളെ സംബന്ധിച്ച ആര്‍ ടി ഐ അപേക്ഷകള്‍ക്ക് സഹകരണ വകുപ്പ് ഇടപെട്ട് വിവരം ലഭ്യമാക്കണം. മറ്റൊരു ഓഫീസിലുള്ള വിവരങ്ങള്‍ക്ക് നിയമ പ്രകാരം അപേക്ഷ അയച്ചുനല്കാതെ പരാതിക്കാരനോട് പുതിയ അപേക്ഷ നല്കാന്‍ പറഞ്ഞ സഹകരണ വകുപ്പിലെ വിവരാധികാരിക്കെതിരെ കാരണം കാണിക്കല്‍ നോട്ടീസ് നല്കും. ലാന്‍ഡ് റവന്യൂ കമ്മീഷണറേറ്റ്, ട്രാന്‍സ്‌പോര്‍ട്ട് കമ്മിഷണറേറ്റ് എന്നിവിടങ്ങളിലെ അപേക്ഷകളിലെ വിവരങ്ങള്‍ തെളിവെടുപ്പില്‍ ലഭ്യമാക്കി.
പ്രതികരിക്കാൻ ഇവിടെ എഴുതുക: