ന്യൂദൽഹി: ദൽഹിയിൽ നാൽപ്പതിലധികം സ്കൂളുകൾക്കു നേരെ ബോംബ് ഭീഷണി. സ്കൂൾ പരിസരത്ത് ബോംബ് വച്ചിട്ടുണ്ടെന്നും സ്ഫോടനമുണ്ടായാൽ വലിയ നാശനഷ്ടമുണ്ടാവുമെന്നും സന്ദേശത്തിൽ പറയുന്നു. സന്ദേശമെത്തിയതിനു പിന്നാലെ പോലീസ് വിദ്യാർഥികളെ തിരികെ വീട്ടിലേക്കയച്ചു.
പണം ആവശ്യപ്പെട്ടാണ് ഭീഷണി. ഇ-മെയിൽ വഴിയാണ് ഭീഷണി സന്ദേശം ലഭിച്ചത്. ആദ്യം 2 സ്കൂളുകൾക്കും പിന്നാലെ 40 ഓളം സ്കൂളുകൾ‌ക്കുമാണ് ഭീഷണി സന്ദേശം ലഭിച്ചത്. സംഭവത്തിൽ പോലീസ് അന്വേഷണം ആരംഭിച്ചു. സന്ദേശമയച്ചയാളുടെ ഐപി അഡ്രസ് പരിശോധിക്കുകയാണ് ദൽഹി പോലീസ്. ഞായ റാഴ്ച രാത്രി 11.38നാണ് മെയിൽ സന്ദേശം ലഭിച്ചത്.
ബോംബ് നിർവീര്യമാക്കാൻ 30,000 ഡോളറാണ് ആവശ്യപ്പെട്ടിരിക്കുന്നത്. ആർകെ പുരത്തുള്ള ദൽഹി പബ്ലിക് സ്കൂൾ, പശ്ചിം വിാഹാറിലെ ജിഡി ഗോയങ്ക പബ്ലിക് സ്കൂൾ എന്നിവയ്‌ക്കു നേരെയാണ് ആദ്യം ഭീഷണി സന്ദേശമെത്തിയത്. രാജ്യത്തെ വിവിധ സിആർപിഎഫ് സ്കൂളുകൾക്ക് നേരെ ഭീഷണി സന്ദേശമെത്തി രണ്ടുമാസത്തിനു ശേഷമാണ് വീണ്ടും സമാന ഭീഷണി സന്ദേശം എത്തിയത്.
പ്രതികരിക്കാൻ ഇവിടെ എഴുതുക: