ചെങ്ങന്നൂര്: ഗുണമേന്മയുള്ള ക്വാറി ഉല്പ്പന്നങ്ങളുടെ ലഭ്യതക്കുറവും തൊഴിലാളികളുടെ അഭാവവും കാരണം നിര്മാണ മേഖല പ്രതിസന്ധിയില്. മുന്വര്ഷങ്ങളെ അപേക്ഷിച്ച് മേഖലയിലെ മുപ്പത് ശതമാനത്തോളം നിര്മാണ പ്രവര്ത്തനങ്ങളും സ്തംഭിച്ചതായാണ് കണക്ക്.അവശ്യവസ്തുക്കളുടെ ലഭ്യതക്കുറവും ഗുണനിലവാരമില്ലായ്മയും വില കൂടുന്നതിന് കാരണമായിട്ടുണ്ട്. എം സാന്റ്, ടി സാന്ഡ് എന്നിവയ്ക്ക് ദിവസേനയാണ് വില ഉയരുന്നത്.
കോണ്ക്രീറ്റിന് ഉപയോഗിക്കുന്ന ക്വാളിറ്റിയുള്ള എം സാന്റിന് ഒരു ക്യുബിക് അടിക്ക് 70 രൂപയാണ് നിരക്ക്. ടി സാന്റിനാകട്ടെ 75 രൂപയാണ്. മഴ കൂടുതല് പെയ്യുന്ന സാഹചര്യത്തില് ഇവയുടെ വില ഇനിയും ഉയരാനാണ് സാധ്യതയെന്ന് കരാറുകാര് പറയുന്നു. മാസത്തില് അഞ്ചിലേറെ പ്രൊജക്ടുകള് ഉണ്ടായിരുന്ന പല കരാറുകാരും ഇപ്പോള് പ്രവര്ത്തികള് ഇല്ലാതെ വിഷമത്തിലാണ്.
മലയാളികളുടെ വിദേശരാജ്യങ്ങളിലേക്കുള്ള കുടിയേറ്റവും നിര്മാണമേഖലയെ ബാധിച്ചതായി ഒരുവിഭാഗം പറയുന്നു. നേരത്തെ അമ്പത് മുതല് അറുപത് ലക്ഷം രൂപ വരെ ചെലവഴിച്ച് വീട് നിര്മിക്കുന്നിടത്ത് ഇപ്പോള് നേര്പകുതി തുകയുടെ നിര്മാണം പോലും നടക്കുന്നില്ല. മുന്വര്ഷങ്ങളെ അപേക്ഷിച്ച് നിര്മാണസാമഗ്രികള്ക്കൊപ്പം വാഹനങ്ങളുടെ വാടകയും വര്ധിച്ചിരിക്കുകയാണ്. വയറിങ് സാമഗ്രികള്ക്കും നിരക്ക് ഉയരുകയാണ്. മൂന്നുവര്ഷം മുമ്പ് 650 രൂപയായിരുന്ന ഒരുസ്ക്വയര് വയറിന് ഇപ്പോള് 1250 രൂപയായിട്ടുണ്ട്.
മെറ്റിലിനും സിമന്റിനും കമ്പിക്കും പ്ലംബിങ് സാമഗ്രികള്ക്കും പത്ത് ശതമാനം വരെ വില കൂടിയിരിക്കുകയാണ്. ഇതോടൊപ്പം കൂലിചെലവും വര്ധിച്ചു.800 രൂപ കൂലിയായിരുന്ന സ്ഥാനത്ത് മൂന്ന് വര്ഷത്തിന് ഇപ്പുറം 1200 രൂപയായിട്ടുണ്ട്.
