മംഗലാപുരം: കൂച്ച് ബെഹാര് ട്രോഫിയില് ഝാര്ഖണ്ഡിനെ 169 റണ്സിന് പുറത്താക്കി കേരളം. ഒന്നാം ഇന്നിങ്സില് ബാറ്റ് ചെയ്യാനിറങ്ങിയ കേരളം ആദ്യ ദിവസം കളി നിര്ത്തുമ്പോള് നാല് വിക്കറ്റ് നഷ്ടത്തില് 76 എന്ന നിലയിലാണ്. ആറ് വിക്കറ്റ് വീഴ്ത്തിയ അഭിരാമിന്റെ ബൗളിങ് മികവാണ് മത്സരത്തില് കേരളത്തെ ശക്തമായ നിലയിലെത്തിച്ചത്.
ടോസ് നേടിയ കേരളം ഫീല്ഡിങ് തെരഞ്ഞെടുക്കുകയായിരുന്നു. ക്യാപ്റ്റന് ബിശേഷ് ദത്തയെ പുറത്താക്കി അഭിരാം കേരളത്തിന് മികച്ച തുടക്കം നല്കി. തുടര്ന്നെത്തിയ കൃഷ് ശര്മ്മയെയും സെന്തു യാദവിനെയും അഭിരാം തന്നെ പുറത്താക്കിയതോടെ ഝാര്ഖണ്ഡ് മൂന്നിന് 36 റണ്സെന്ന നിലയിലായി. നാലാം വിക്കറ്റില് വത്സല് തിവാരിയും വിവേക് കുമാറും ചേര്ന്നുള്ള കൂട്ടുകെട്ട് അവര്ക്ക് പ്രതീക്ഷ നല്കി. ഇരുവരും ചേര്ന്ന് 78 റണ്സ് കൂട്ടിച്ചേര്ത്തുനില്ക്കെ വിവേക് കുമാറിനെ വീഴ്ത്തി അഭിരാം വീണ്ടും കേരളത്തിന് ബലം പകര്ന്നു.
പിന്നീടെത്തിയ ഝാര്ഖണ്ഡ് ബാറ്റര്മാരില് ആര്ക്കും പിടിച്ചു നില്ക്കാനായില്ല. 169 റണ്സില് ഝാര്ഖണ്ഡ് ഒതുങ്ങി. അഭിരാം ആറ് വിക്കറ്റ് വീഴ്ത്തിയപ്പോള് കാര്ത്തിക് രണ്ടും അഹ്മദ് ഇമ്രാനും അബിന് ലാലും ഓരോ വിക്കറ്റ് വീതവും വീഴ്ത്തി.
മറുപടി ബാറ്റിങ്ങിന് ഇറങ്ങിയ കേരളത്തിന് തുടക്കത്തില് തന്നെ മൂന്ന് വിക്കറ്റ് നഷ്ടമായി. രോഹിത്, അക്ഷയ്, സൗരഭ് എന്നിവരെയാണ് നഷ്ടമായത്. ക്യാപ്റ്റന് അഹ്മദ് ഇമ്രാനും കാര്ത്തിക്കും ചേര്ന്നുള്ള കൂട്ടുകെട്ട് പ്രതീക്ഷ നല്കിയെങ്കിലും പത്ത് റണ്സെടുത്ത കാര്ത്തിക് പുറത്തായത് കേരളത്തിന് വീണ്ടും മങ്ങലേല്പ്പിച്ചു. കളി നിര്ത്തുമ്പോള് 21 റണ്സോടെ അഹ്മദ് ഇമ്രാന് ക്രീസിലുണ്ട്.
