തിരുവനന്തപുരം:പാലോട് ഇളവട്ടത്ത് ഭര്തൃഗൃഹത്തില് നവവധുവിനെ തൂങ്ങി മരിച്ച നിലയില് കണ്ടെത്തിയ സംഭവത്തില് ദുരൂഹതയെന്ന് യുവതിയുടെ കുടുംബം.ഇക്കാര്യം ചൂണ്ടിക്കാട്ടി യുവതിയുടെ പിതാവ് പൊലീസില് പരാതി നല്കി.
പാലോട് ഇടിഞ്ഞാര് കൊളച്ചല് കൊന്നമൂട് സ്വദേശി ഇന്ദുജ (25)യെ ആണ് വെളളിയാഴ്ച ഉച്ചക്ക് വീടിനുള്ളില് മരിച്ച നിലയില് കണ്ടെത്തിയത്.
ഭര്തൃ വീട്ടില് മാനസിക പീഡനങ്ങളും ഭീഷണിയും പതിവായിരുന്നതായി മകള് തങ്ങളെ അറിയിച്ചിരുന്നതായി ഇന്ദുജയുടെ കുടുംബം വെളിപ്പെടുത്തി. എന്നാല് തങ്ങളെ അവിടേക്ക് ചെല്ലാന് അനുവദിച്ചിരുന്നില്ലെന്നും കുടുംബാംഗങ്ങള് പറഞ്ഞു.
പാലോട് പൊലീസ് കേസെടുത്തു അന്വേഷണം ആരംഭിച്ചിട്ടുണ്ട്. ഭര്ത്താവ് അഭിജിത്തിന്റെ വീട്ടിലെ രണ്ടാമത്തെ നിലയിലെ കിടപ്പുമുറിയിലെ ജനലില് തൂങ്ങിയ നിലയിലാണ് യുവതിയെ കണ്ടത്. അഭിജിത്ത് ഉച്ചയ്ക്ക് വീട്ടില് ഊണ് കിക്കാനായി എത്തിയപ്പോഴാണ് ഇന്ദുജയെ ജനലില് കെട്ടിത്തൂങ്ങിയ നിലയില് കാണുന്നത്. ഉടനെ തന്നെ നെടുമങ്ങാട് ജില്ലാ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.
രണ്ട് വര്ഷത്തെ പ്രണയത്തെ തുടര്ന്ന് ഇന്ദുജയെ മൂന്ന് മാസം മുമ്പ് അഭിജിത്ത് വീട്ടില് നിന്നും വിളിച്ചിറക്കി കൊണ്ട് പോയി അമ്പലത്തില് വെച്ച് വിവാഹം കഴിച്ച് ഒപ്പം താമസിപ്പിക്കുകയായിരുന്നു. സ്വകാര്യ ലാബിലെ ജീവനക്കാരിയാണ് ഇന്ദുജ. അഭിജിത്ത് സ്വകാര്യ വാഹന കമ്പനിയിലെ ജീവനക്കാരനും. സംഭവം നടക്കുമ്പോള് വീട്ടില് അഭിജിത്തിന്റെ അമ്മൂമ്മ മാത്രമാണ് ഉണ്ടായിരുന്നത്.
ഇന്ദുജ തന്റെ അമ്മയും സഹോദരനുമായി ഫോണില് സംസാരിക്കാറുണ്ടായിരുന്നുവെന്നാണ് ഭര്തൃ വീട്ടുകാര് പറഞ്ഞു.
