തൊടുപുഴ : മൂന്ന് വ്യത്യസ്ത സംഭവങ്ങളിലായി കിണറുകളിൽ അകപ്പെട്ട മൃഗങ്ങൾക്ക് തൊടുപുഴ ഫയർഫോഴ്സ് രക്ഷകരായി. വ്യാഴാഴ്ച ഉച്ചയ്ക്ക് 12.10 ന് മണക്കാട് സ്വദേശിയായ താനാട്ട് ജനാർദ്ദനന്റെ കിണറ്റിൽ ഒരു നായ വീണതായിരുന്നു ആദ്യത്തെ സംഭവം. മൂന്നുദിവസമായി കിണറിൽ അകപ്പെട്ട നായയെ രക്ഷപ്പെടുത്താൻ വീട്ടുകാരും നാട്ടുകാരും ശ്രമിച്ചെങ്കിലും സാധിക്കാത്തതിനാൽ ആണ് ഫയർഫോഴ്സിൽവിവരം അറിയിച്ചത്.
ഉടൻതന്നെ ഫയർഫോഴ്സ് അധികൃത സ്ഥലത്തെത്തി. ചുറ്റുമതിൽ ഇല്ലാത്ത ഉപയോഗശൂന്യമായ കിണറിന് 18 അടി താഴ്ചയും അതിൽ വെള്ളം ഇല്ലാത്തതുമായിരുന്നു. ഫയർ ഓഫീസറായ ഷിബിൻ ഗോപി റെസ്ക്യു നെറ്റിൽ കിണറിൽ ഇറങ്ങി നായയെ സുരക്ഷിതമായി കരക്കെത്തിക്കുകയായിരുന്നു. ഗ്രേഡ് അസിസ്റ്റന്റ് സ്റ്റേഷൻ ഓഫീസർ കെ എ ജാഫർഖാന്റെ നേതൃത്വത്തിൽ എത്തിയ ഫയർഫോഴ്സ് സംഘത്തിലെ ജെയിംസ് പുന്നൻ, ഫ്രിജിൻ എഫ് എസ്, രാജീവ് ആർ നായർ എന്നിവർ ചേർന്നാണ് രക്ഷാപ്രവർത്തനം നടത്തിയത്.
വെള്ളിയാഴ്ച പുലർച്ചെ 4 മണിക്ക് ആയിരുന്നു രണ്ടാമത്തെ സംഭവം ഉണ്ടായത്. കോടിക്കുളം പഞ്ചായത്ത് നെയ്യശേരിയിൽ താമസിക്കുന്ന അരഞ്ഞാണിയിൽ സണ്ണി ജോസഫിന്റെ പശു തൊഴുത്തിനോട് ചേർന്നുള്ള ചാണകക്കുഴിയിൽ അകപ്പെട്ടപ്പോഴും ഫയർഫോഴ്സ് രക്ഷകരായി.
ചാണകം കോരി മാറ്റിയതിനുശേഷം സമീപത്തെ മണ്ണ് അല്പം ഇടിച്ച് പശുവിനെ റെസ്ക്യു ബെൽറ്റ് ഉപയോഗിച്ച് വലിച്ചു കരയ്ക്ക് എത്തിക്കുകയായിരുന്നു. പശുവിന് പരിക്കുകൾ ഒന്നും പറ്റിയിരുന്നില്ല. ഗ്രേഡ് അസിസ്റ്റന്റ് സ്റ്റേഷൻ ഓഫീസർ കെ എ ജാഫർഖാന്റെ നേതൃത്വത്തിൽ അനൂപ് പി എൻ, ബിനോദ് എം കെ, ഷിബിൻ ഗോപി, അഖിൽ എസ്, ഫ്രിജിൻ എഫ് എസ് എന്നിവർ ചേർന്നാണ് രക്ഷാപ്രവർത്തനം നടത്തിയത്.
വെള്ളിയാഴ്ച രാവിലെ എട്ടുമണിക്ക് ആയിരുന്നു മൂന്നാമത്തെ സംഭവം. കരിങ്കുന്നം പഞ്ചായത്തിലെ പൊന്നന്താനം എന്ന സ്ഥലത്ത് വടക്കഞ്ചേരിയിൽ മത്തായി എന്നയാളുടെ കിണറ്റിൽ സമീപവാസിയായ പാമ്പനാൽ രതീഷ് രവിയുടെ ഗർഭിണിപ്പശു അകപ്പെടുകയായിരുന്നു. 25 അടി താഴ്ചയുള്ള കിണറ്റിൽ 10 അടിയോളം വെള്ളവും ഉണ്ടായിരുന്നു.
സ്ഥലത്തെത്തിയ ഫയർഫോഴ്സ് സംഘത്തിലെ സേനാംഗങ്ങളായ ഷിബിൻ ഗോപി, ബിനോദ് എം കെ എന്നിവർ കിണറ്റിൽ ഇറങ്ങി റെസ്ക്യു ബെൽറ്റ്, റോപ്പ് എന്നിവ ഉപയോഗിച്ച് പശുവിനെ ആദ്യം സുരക്ഷിതമായി ബന്ധിച്ചു. അതിനുശേഷം മറ്റ് സേനാംഗങ്ങളുടെയും, നാട്ടുകാരുടെയും സഹായത്തോടെ പശുവിനെ വലിച്ച് കരയ്ക്ക് എത്തിക്കുകയായിരുന്നു.
വീഴ്ചയിൽ പശുവിന് ചെറിയ പരിക്കുകൾ ഏറ്റിരുന്നു. കിണറിന്റെ വശത്ത് നിറയെ ചെളി ഉണ്ടായിരുന്നതിനാലും, പശുവിന്റെ വലിപ്പക്കൂടുതലും കാരണം ഏകദേശം ഒന്നേകാൽ മണിക്കൂർ സമയമെടുത്താണ് രക്ഷാപ്രവർത്തനം പൂർത്തിയാക്കിയത്.
ഗ്രേഡ് അസിസ്റ്റൻ്റ സ്റ്റേഷൻ ഓഫീസർ കെ എ ജാഫർഖാന്റെ നേതൃത്വത്തിൽ എത്തിയ ഫയർഫോഴ്സ് സംഘത്തിൽ ഫ്രിജിൻ എഫ് എസ്,അനൂപ് പി എൻ, മാത്യു ജോസഫ്, രാജീവ് ആർ നായർ എന്നിവരും ഉണ്ടായിരുന്നു.
