മലപ്പുറം: പതിനാലുകാരിയെ നിരന്തരം ലൈംഗിക പീഡനത്തിനിരയാക്കിയ രണ്ടാനച്ഛന് 141 വർഷം തടവുശിക്ഷ വിധിച്ച് മഞ്ചേരി പോക്സോ കോടതി. മലപ്പുറത്തെ പല വാടക കോർട്ടേഴ്സുകളിലായി താമസിച്ചിരുന്ന തമിഴ്നാട് സ്വദേശിയെയാണ് ശിക്ഷിച്ചത്. തടവുശിക്ഷക്ക് പുറമേ ഇയാൾ ഏഴുലക്ഷത്തി എൺപത്തിഅയ്യായിരം രൂപ പിഴയൊടുക്കണമെന്നും കോടതിവിധിയിൽ പറയുന്നു.
തമിഴ്നാട് സ്വദേശികളായ ദമ്പതികൾ മലപ്പുറത്ത് വാടക വീടുകളിലാണ് താമസിച്ചിരുന്നത്. ഭാര്യയുടെ ആദ്യബന്ധത്തിലെ മകളെയാണ് പ്രതി നിരന്തരം ലൈംഗിക പീഡനത്തിന് ഇരയാക്കിയത്. അമ്മ വീട്ടു ജോലിക്ക് പോയതിന് ശേഷമാണ് പ്രതി കുട്ടിയെ ഉപദ്രവിച്ചിരുന്നത്. 2020 മുതലായിരുന്നു നിരന്തര പീഡനം. പീഡന വിവരം പുറത്ത് പറയരുതെന്ന് കുട്ടിയെ ഭീഷണിപ്പെടുത്തുകയും ചെയ്തിരുന്നു.
ഒരിക്കൽ കൂട്ടുകാരിയുമൊത്ത് കളിച്ചുകൊണ്ടിരുന്ന കുഞ്ഞിനെ പ്രതി ബലം പ്രയോഗിച്ച് വീട്ടിൽ വിളിച്ചു കൊണ്ടു പോയി പീഡിപ്പിച്ചു. പിന്നാലെ കുട്ടി പീഡന വിവരം സുഹൃത്തിനോട് പറയുകയായിരുന്നു. കൂട്ടുകാരിയുടെ നിർദ്ദേശ പ്രകാരം കുട്ടി സംഭവം അമ്മയോട് പറഞ്ഞു. തുടർന്ന് അമ്മയാണ് പൊലീസിൽ പരാതി നൽകിയത്.
കേസിൽ 12 സാക്ഷികളെയും 24 രേഖകളും പ്രോസിക്യൂഷൻ കോടതിയിൽ ഹാജരാക്കി. സംഭവത്തിനുശേഷം കുട്ടിയെ നിർഭയ ഹോമിലേക്ക് മാറ്റിയിരുന്നു. 2022ൽ ഇവിടെ നിന്നും അമ്മയുടെ സംരക്ഷണയിൽ വിട്ട കുട്ടിയെ പ്രതി വീണ്ടും ലൈംഗികമായി ഉപദ്രവിച്ചു. നിലവിൽ ഈ കേസ് കോടതിയുടെ പരിഗണയിലാണ്.
