കാന്‍ബെറ: ബോര്‍ഡര്‍-ഗവാസ്‌കര്‍ ട്രോഫി ടെസ്റ്റ് പരമ്പരയ്‌ക്കെത്തിയ ഭാരത ക്രിക്കറ്റ് ടീം ഇന്ന് പ്രൈം മിനിസ്റ്റേഴ്‌സ് ഇലവനുമായി രണ്ട് ദിന മത്സരത്തിനിറങ്ങും. ആറിന് അഡ്‌ലെയ്ഡില്‍ ഓസ്‌ട്രേലിയക്കെതിരായ രണ്ടാം ടെസ്റ്റിന് മുമ്പേ നടക്കുന്ന ഈ മത്സരത്തില്‍ മികച്ചൊരു പരിശീലന അവസരമായാണ് ഭാരത ക്യാമ്പ് കണക്കാക്കുന്നത്.
ഇന്നും നാളെയുമായി നടക്കുന്ന മത്സരത്തിലെ പ്രകടനത്തിലെ വിലയിരുത്തലുകള്‍ കൂടി പരിഗണിച്ചായിരിക്കും ടീമിലെ അഴിച്ചുപണികള്‍ നടത്തുക. രോഹിത് ശര്‍മയും ശുഭ്മാന്‍ ഗില്ലും തിരികെ വന്ന സാഹചര്യത്തില്‍ ആദ്യ ടെസ്റ്റില്‍ നിന്നും എന്തൊക്കെ വ്യത്യാസം വരുത്തണമെന്ന കാര്യത്തില്‍ തീരുമാനമാകാനുണ്ട്.
ബാറ്റിങ് ഓര്‍ഡറില്‍ ഈ രണ്ട് പേരുടെയും പകരക്കരായി ആദ്യ ടെസ്റ്റില്‍ ഇറങ്ങിയ ഭാരത ബാറ്റര്‍മാര്‍ മികച്ച പ്രകടനം കാഴ്‌ച്ചവച്ചിരുന്നു. പെര്‍ത്തില്‍ നടന്ന ആ ടെസ്റ്റില്‍ ആതിഥേയരെ 295 റണ്‍സിന് തോല്‍പ്പിച്ച ഭാരതം പരമ്പരയില്‍ 1-0ന് മുന്നിലാണ്.
പ്രതികരിക്കാൻ ഇവിടെ എഴുതുക