കൊച്ചി: വീട്ടിലെത്തി പൂജകള്‍ നടത്തിയ മന്ത്രവാദി പതിനൊന്നര പവന്‍ സ്വര്‍ണാഭരണങ്ങളുമായി കടന്നു.ഗൃഹനാഥന്റെ മദ്യപാനവും കുടുംബത്തിലെ പ്രേതബാധയും മാറ്റാമെന്ന് പറഞ്ഞായിരുന്നു മന്ത്രവാദിയായ യുവാവ് വീട്ടിലെത്തി പൂജകള്‍ നടത്തിയത്.
നായരമ്പലം നെടുങ്ങാട് ആണ് സംഭവം. പൂജകള്‍ക്ക് മുമ്പ് വീട്ടിലുള്ളവരുടെ ശരീരത്തിലുണ്ടായിരുന്നതും മറ്റിടങ്ങളില്‍ സൂക്ഷിച്ചിട്ടുള്ളതുമായ സ്വര്‍ണാഭരണങ്ങള്‍ ഊരി കിഴി കെട്ടി 60 ദിവസം പൂജയ്‌ക്ക് സമര്‍പ്പിക്കണമെന്ന് പറഞ്ഞാണ് മന്ത്രവാദി വാങ്ങിയത്.
പുറത്തറിഞ്ഞാല്‍ ഫലം കിട്ടില്ലെന്നും അതിനാല്‍ പുറത്താരും ഇതറിയരുതെന്നും മന്ത്രവാദി പറഞ്ഞെന്ന് വീട്ടുകാര്‍ വെളിപ്പെടുത്തി. പൂജകള്‍ക്ക് ശേഷം മന്ത്രവാദി മുങ്ങിയതോടെയാണ് വീട്ടുകാര്‍ തട്ടിപ്പ് മനസിലാക്കുന്നത്.
വീട്ടുകാരുടെ ബന്ധുവായ സ്ത്രീയാണ് മന്ത്രവാദിയായ യുവാവിനെ പരിചയപ്പെടുത്തിയത്. സംഭവത്തില്‍ വീട്ടുകാര്‍ ഞാറക്കല്‍ പൊലീസില്‍ പരാതി നല്‍കി. തുടര്‍ന്ന് പറവൂര്‍ താണിപ്പാടം സ്വദേശി ശ്യാമിനെതിരെ കേസ് എടുത്തു.
പ്രതികരിക്കാൻ ഇവിടെ എഴുതുക