ചെന്നൈ: തമിഴ് നടൻ ധനുഷും സംവിധായിക ഐശ്വര്യ രജനികാന്തും ഔദ്യോഗികമായി വിവാഹമോചിതരായി. ദമ്പതികൾക്ക് ഒരുമിച്ച് ജീവിക്കാൻ കഴിയില്ലെന്ന് പറഞ്ഞതിനാൽ ചെന്നൈ കുടുംബക്ഷേമ കോടതി വിവാഹമോചനം അനുവദിച്ചതായി സൺ ടിവി റിപ്പോര്‍ട്ട് ചെയ്യുന്നു.
നേരത്തെ മൂന്ന് തവണ കേസ് പരിഗണിച്ചിരുന്നുവെങ്കിലും ധനുഷും ഐശ്വര്യയും ഒരു സെഷനിലും ഹാജരായില്ല. അന്തിമ വിവാഹമോചന ഉത്തരവ് പുറപ്പെടുവിക്കുമെന്ന് പ്രതീക്ഷിച്ചിരുന്നതിനാല്‍ ഇന്ന് ഐശ്വര്യ കോടതിയിൽ ഹാജരായിരുന്നു.
2004ലാണ് ധനുഷും ഐശ്വര്യയും വിവാഹിതരായത്. 2022 ജനുവരി 17 ന്,എക്സിലെ ഒരു പോസ്റ്റിലൂടെയാണ് ധനുഷ് തങ്ങളുടെ വേർപിരിയൽ പ്രഖ്യാപിച്ചത്, “സുഹൃത്തുക്കളായും ദമ്പതികളായും പരസ്പരം മാതാപിതാക്കളായും അഭ്യുദയകാംക്ഷികളായും 18 വർഷം ഒരുമിച്ചുനിന്നു. ഇന്ന്, ഞങ്ങളുടെ പാതകൾ വേർതിരിക്കുന്ന ഒരു സ്ഥലത്താണ് ഞങ്ങൾ നിൽക്കുന്നത്”- ധനുഷ് കുറിച്ചു. സമാനമായ ഒരു സന്ദേശം ഐശ്വര്യയും പങ്കുവെച്ചിരുന്നു.
അടുത്തിടെ നടി നയൻതാര തന്റെ നെറ്റ്ഫ്ലിക്സ് വിവാഹ ഡോക്യുമെൻ്ററിയിൽ 2015 ലെ തമിഴ് ചിത്രമായ നാനും റൗഡി താനിലെ ദൃശ്യങ്ങൾ ഉപയോഗിക്കാൻ അനുമതി നിഷേധിച്ചതിന് നടൻ ധനുഷിനെതിരെ ആരോപണം ഉന്നയിച്ചിരുന്നു. ധനുഷ് ആയിരുന്നു ചിത്രം നിർമിച്ചത്. സിനിമയിൽ നിന്ന് മൂന്ന് സെക്കൻഡ് പിന്നിലെ വിഡിയോ ഉൾപ്പെടുത്തിയതിന് 10 കോടി രൂപ നഷ്ടപരിഹാരം ആവശ്യപ്പെട്ട് വക്കീൽ നോട്ടീസ് അയച്ചതിനെയും അവർ വിമർശിച്ചു .
തന്റെ സമ്മതമില്ലാതെ നാനും റൗഡി താനിൽ നിന്നുള്ള ദൃശ്യങ്ങൾ ഉപയോഗിച്ചെന്ന് ആരോപിച്ച് നയൻതാരയ്‌ക്കെതിരെ സിവിൽ കേസ് ഫയൽ ചെയ്തിട്ടുണ്ട്. നയൻതാരയെയും അവരുടെ ഭർത്താവ് ചലച്ചിത്ര നിർമ്മാതാവ് വിഘ്നേഷ് ശിവനെയും പ്രതികളാക്കി ധനുഷ് മദ്രാസ് ഹൈക്കോടതിയിൽ കേസ് സമർപ്പിച്ചിട്ടുണ്ട്.
പ്രതികരിക്കാൻ ഇവിടെ എഴുതുക