മുംബൈ: മഹായുതി സഖ്യത്തിനുള്ളിലെ മഹാരാഷ്‌ട്രയുടെ ഉന്നത സ്ഥാനം ആര്‍ക്ക്? ദേവേന്ദ്ര ഫഡ്നാവിസ് ആണോ ഏക്നാഥ് ഷിന്‍ഡെ ആണോ മഹാരാഷ്ട്ര മുഖ്യമന്ത്രിയാകുന്നത്- ഇന്ന് ഈ കാര്യത്തില്‍ തീരുമാനം ഉണ്ടാകുമെന്നാണ് ഉന്നതവൃത്തങ്ങള്‍ പറയുന്നത്. മഹാരാഷ്‌ട്രയില്‍ ബിഹാര്‍ ഫോര്‍മുല ആവര്‍ത്തിക്കുന്ന പ്രശ്നമില്ലെന്നാണ് ബിജെപി പറയുന്നത്. ഭരണഘടനാപരമായ ബാധ്യതയിൽ ചൊവ്വാഴ്ച, മഹാരാഷ്ട്ര മുഖ്യമന്ത്രി ഏകനാഥ് ഷിൻഡെ രാജിവച്ചെങ്കിലും മുഖ്യമന്ത്രി സ്ഥാനത്തെക്കുറിച്ചുള്ള സസ്‌പെൻസ് തുടരുകയായിരുന്നു.
‘നിതീഷ് കുമാറിനെ മുഖ്യമന്ത്രി ആക്കാനുള്ള പ്രഖ്യാപനം തിരഞ്ഞെടുപ്പിന് മുമ്പുണ്ടായതാണ്, മഹാരാഷ്‌ട്രയില്‍ ശിവസേനയോട് അത്തരമൊരു പ്രതിബദ്ധത ഉണ്ടായിട്ടില്ല’ ബിജെപി ദേശീയ വക്താവ് പ്രേം ശുക്ല ഒരു ദേശീയ മാധ്യമത്തോട് പറഞ്ഞു. ബിഹാറില്‍ ജനതാദള്‍(യുണൈറ്റഡ്) മായി സഖ്യം ഉണ്ടായിരുന്നു. ഇവിടെ അങ്ങനെ ഉണ്ടായിട്ടില്ല. അതുകൊണ്ട് മഹാരാഷ്‌ട്രയില്‍ ബിഹാര്‍ ആവര്‍ത്തിക്കുമെന്ന സംശയത്തിന്റെ ആവശ്യമേ ഇല്ല എന്നും ശുക്ല പറഞ്ഞു.
ബിഹാറിന് ബാധകമായ മാതൃക മഹാരാഷ്‌ട്രയില്‍ ബാധകമല്ല. ‘മഹാരാഷ്‌ട്രയിൽ, ഞങ്ങൾക്ക് ശക്തമായ സംഘടനാ അടിത്തറയും നേതൃത്വവും ഉള്ളതിനാൽ അത്തരമൊരു പ്രതിബദ്ധതയ്‌ക്ക് ഒരു കാരണവുമില്ല. എല്ലാറ്റിനുമുപരിയായി, തിരഞ്ഞെടുപ്പിന് ശേഷവും ഏകനാഥ് ഷിൻഡെ മുഖ്യമന്ത്രിയായി തുടരാനുള്ള പ്രതിജ്ഞാബദ്ധത പാർട്ടി ഒരിക്കലും നൽകിയിട്ടില്ല. നേരെമറിച്ച്, മുഖ്യമന്ത്രിയെ തീരുമാനിക്കുന്നത് തിരഞ്ഞെടുപ്പ് ഫലത്തെ അടിസ്ഥാനമാക്കിയായിരിക്കുമെന്ന് തിരഞ്ഞെടുപ്പിലുടനീളം ഉന്നത നേതൃത്വം വൃക്തമാക്കുകയും ചെയ്തിരുന്നു’ – ശുക്ല പറഞ്ഞു.
തിരഞ്ഞെടുപ്പിന് മുമ്പ് ഷിൻഡെയ്‌ക്ക് ഉന്നത പദവി വാഗ്‌ദാനം ചെയ്‌തിരുന്നുവെന്ന ചില സേനാ നേതാക്കളുടെ അവകാശവാദങ്ങൾ മുൻ കേന്ദ്രമന്ത്രിയും ബിജെപിയുടെ തിരഞ്ഞെടുപ്പ് കോ-ഓർഡിനേറ്ററുമായ റാവുസാഹെബ് ദൻവെ തള്ളിക്കളഞ്ഞു. ‘മുഖ്യമന്ത്രിയെ തിരഞ്ഞെടുക്കുന്നതിനുള്ള നടപടികൾ ആരംഭിച്ചു. രണ്ട് പാർട്ടികൾ ഇതിനകം തന്നെ അവരുടെ നിയമസഭാ നേതാക്കളെ നിയമിച്ചു, ബിജെപി ഉടൻതന്നെ ഒരാളെ തിരഞ്ഞെടുക്കും, ”അദ്ദേഹം പറഞ്ഞു.
മുഖ്യമന്ത്രി സ്ഥാനം പാർട്ടി നിലനിർത്തുമെന്ന് ബിജെപി ഷിൻഡെയെ അറിയിച്ചതായി മുതിർന്ന സേനാ നേതാവ് പറഞ്ഞു. പാർട്ടി ഔദ്യോഗികമായി സ്ഥിരീകരിച്ചിട്ടില്ലെങ്കിലും ഫഡ്‌നാവിസിനെ മൂന്നാം തവണയും മുഖ്യമന്ത്രിയാക്കാൻ ബിജെപി തീരുമാനിച്ചതായി കേന്ദ്രമന്ത്രി രാംദാസ് അത്താവലെ ന്യൂദൽഹിയിൽ പറഞ്ഞു.
288 നിയമസഭാ സീറ്റുകളിൽ 232ലും മഹായുതി സഖ്യം വിജയിച്ചു. അതിൽ 132 സീറ്റുകളുമായി ബിജെപി ഏറ്റവും വലിയ ഒറ്റക്കക്ഷിയായി ഉയർന്ന് സംസ്ഥാനത്ത് ആധിപത്യം ഉറപ്പിച്ചു. കോൺഗ്രസ്, എൻസിപി (ശരദ് പവാർ വിഭാഗം), ഉദ്ധവ് താക്കറെയുടെ ശിവസേന എന്നിവരടങ്ങുന്ന പ്രതിപക്ഷമായ മഹാ വികാസ് അഘാഡി (എംവിഎ)ക്ക് 49 സീറ്റുകൾ മാത്രമാണ് നേടാനായത്.
പ്രതികരിക്കാൻ ഇവിടെ എഴുതുക