ശബരിമല: സന്നിധാനത്ത് തിരക്ക് നിയന്ത്രിക്കാന് നിയോഗിക്കപ്പെട്ട പോലീസിന്റെ രണ്ടാം ബാച്ച് ചുമതലയേറ്റ് മണിക്കൂറുകള്ക്കുള്ളില് മേലെ തിരുമുറ്റത്തെ നിയന്ത്രണം പാടേ പാളി. ഹരിവരാസനം പാടി നടയടച്ച ശേഷം സന്നിധാനത്ത് ശേഷിക്കുന്ന ഭക്തരെ പുറത്തേക്ക് ഇറക്കുന്ന വടക്കേ നടയിലെ ഗേറ്റ് ഡ്യൂട്ടിയില് ഉണ്ടായിരുന്ന പോലീസ് ഉദ്യോഗസ്ഥന് ചങ്ങല ഉപയോഗിച്ച് പൂട്ടിയതാണ് പ്രതിസന്ധി സൃഷ്ടിച്ചത്.
ഇതോടെ വലിയ നടപ്പന്തലില് അടക്കം തിരക്ക് നിയന്ത്രണം വിട്ടു. ഹരിവരാസനം തൊഴാന് കാത്തു നിന്നവരും ഇരുമുടിയേന്തി പടികയറി എത്തിയ ഇതര സംസ്ഥാന ഭക്തരും പുറത്തേക്കിറങ്ങാന് വഴിയില്ലാതെ ആശങ്കയിലായി. ഗേറ്റ് പൂട്ടിയ സംഭവമറിഞ്ഞ് എത്തിയ സന്നിധാനം സ്പെഷ്യല് ഓഫീസര് പോലീസ് ഉദ്യോഗസ്ഥനെ പരസ്യമായി ശകാരിച്ചു. തിങ്കളാഴ്ച രാത്രി ഹരിവരാസനം പാടി നടയടച്ച ശേഷം ആയിരുന്നു സംഭവങ്ങളുടെ തുടക്കം. മേലെ തിരുമുറ്റത്ത് ഡ്യൂട്ടിയില് ഉണ്ടായിരുന്ന സിഐയുടെ നിര്ദ്ദേശപ്രകാരം ഭക്തരെ പുറത്തേക്കിറക്കുന്ന വടക്കേ ഗേറ്റ് പൂട്ടുകയായിരുന്നു. പതിവുപോലെ വടക്കേ നട വഴി പുറത്തേക്ക് ഇറങ്ങാന് എത്തിയ തീര്ത്ഥാടകരോട് സ്റ്റാഫ് ഗേറ്റ് വഴി പുറത്തിറങ്ങാന് സിഐ നിര്ദേശിച്ചു.
വടക്കേ നടവഴി തീര്ത്ഥാടകരെ പുറത്തേക്ക് ഇറക്കുന്നതാണ് രീതി എന്ന് മാധ്യമപ്രവര്ത്തകരും ഡ്യൂട്ടിയില് ഉണ്ടായിരുന്ന എന്ഡിആര്എഫ് ഉദ്യോഗസ്ഥരും പറഞ്ഞെങ്കിലും സിഐ ചെവിക്കൊണ്ടില്ല. ഇതോടെ സ്റ്റാഫ് ഗേറ്റില് ആളുകളുടെ തിക്കും തിരക്കുമായി. ഇത് മൂലം വലിയ നടപ്പന്തലില് ക്യൂ നില്ക്കുന്ന തീര്ത്ഥാടകരെ പതിനെട്ടാംപടി കയറ്റാന് കഴിയാത്ത സാഹചര്യമായി. താഴെ തിരുമുറ്റത്തും വലിയ നടപ്പന്തലിലും ഡ്യൂട്ടിയില് ഉണ്ടായിരുന്ന പോലീസുകാര് സംഭവമറിയാതെ കുഴങ്ങി.
ഇതോടെ വലിയ നടപ്പന്തല് അടക്കം തീര്ത്ഥാടകരെ കൊണ്ട് തിങ്ങിനിറഞ്ഞു. സംഭവമറിഞ്ഞ് പതിനൊന്നരയോടെ സന്നിധാനം സ്പെഷ്യല് ഓഫീസര് കെ.ഇ. ബൈജു പാഞ്ഞെത്തി. രാവിലെ നടന്ന ബ്രീഫിങ്ങില് സന്നിധാനത്ത് പാലിക്കേണ്ട നടപടിക്രമങ്ങള് സംബന്ധിച്ച് വ്യക്തമാക്കിയിരുന്നില്ലേ എന്ന് ചോദിച്ചായിരുന്നു സിഐക്ക് നേരെ സ്പെഷ്യല് ഓഫീസറുടെ ശകാരം. തുടര്ന്ന് പൂട്ടിയ വടക്കേ നടയിലെ ഗേറ്റ് തുറക്കാന് നിര്ദ്ദേശിച്ചു. ഇതോടെയാണ് സന്നിധാനത്തെ തിരക്ക് നിയന്ത്രണവിധേമായത്.
ജന്മഭൂമി ഓണ്ലൈന്