ശബരിമല: തീര്‍ത്ഥാടനം തുടങ്ങിയ ശേഷം സന്നിധാനത്തുനിന്ന് ഇതുവരെ വനം വകുപ്പ് പിടികൂടിയത് 33 പാമ്പുകളെ. ഇവയെ എല്ലാം ഉള്‍വനത്തില്‍ വിട്ടു. അഞ്ച്് അണലികളും 14 കാട്ടുപാമ്പുകളും ഇതില്‍പെടുന്നു. തീര്‍ത്ഥാടന കാലം സുരക്ഷിതമാക്കുന്നതിന് വനം വകുപ്പ് വിപുലമായ ക്രമീകരണങ്ങള്‍ ഒരുക്കിയിട്ടുണ്ടെന്ന് സന്നിധാനത്തെ വനം വകുപ്പ് സ്പെഷ്യല്‍ ഓഫീസര്‍ ടി. ലിതേഷ് പറഞ്ഞു.
ഇന്നലെ പതിനെട്ടാം പടിയ്‌ക്ക് സമീപം ഭീതി പരത്തിയ പാമ്പിനെ വനം വകുപ്പ് ഉദ്യോഗസ്ഥര്‍ എത്തി പിടികൂടിയിരുന്നു. പതിനെട്ടാം പടിക്ക് താഴെ മഹാ കാണിയ്‌ക്ക ഭാഗത്ത് നിന്നും അപ്പം, അരവണ കൗണ്ടറുകളിലേക്ക് പോകുന്നതിനുള്ള അടിപ്പാതയുടെ പടിക്കെട്ടിന്റെ തുടക്കഭാഗത്തെ കൈവരിയിലാണ് പാമ്പിനെ കണ്ടത്. നൂറുകണക്കിന് ഭക്തര്‍ കടന്നുപോകുന്ന പടിക്കെട്ടിന്റെ തുടക്ക ഭാഗത്ത് ഡ്യൂട്ടിയില്‍ ഉണ്ടായിരുന്ന പോലീസുകാരാണ് കൈവരിയില്‍ നീണ്ട നിവര്‍ന്നു കിടക്കുന്ന നിലയില്‍ രണ്ടടിയിലേറെ നീളം വരുന്ന പാമ്പിനെ കണ്ടത്. ഉടന്‍തന്നെ ഈ ഭാഗത്ത് കൂടി തീര്‍ത്ഥാടകര്‍ അടിപ്പാതയിലേക്ക് കടക്കുന്നത് തടഞ്ഞു. സംഭവം അറിഞ്ഞ് എത്തിയ വനം വകുപ്പ് ഉദ്യോഗസ്ഥര്‍ പിടികൂടാന്‍ ശ്രമിക്കുന്നതിനിടെ പാമ്പ് കൈവരിയില്‍ നിന്നും പടിക്കട്ടിലേക്ക് ചാടി. തുടര്‍ന്ന് പാമ്പിനെ പിടികൂടി കുപ്പിയില്‍ ആക്കി. ഇതോടെ് 20 മിനിറ്റ്് നീണ്ട ഉദ്വേഗത്തിന് വിരാമമായി. വിഷമില്ലാത്ത കാട്ടുപാമ്പ് ആണ് ഇതെന്ന് വനം വകുപ്പ് ഉദ്യോഗസ്ഥര്‍ പറഞ്ഞു. സന്നിധാനത്തിന്റെ പല ഭാഗങ്ങളില്‍ നിന്നും വിഷപ്പാമ്പുകളെ പിടികൂടാറുണ്ടെങ്കിലും പതിനെട്ടാം പടിക്ക് സമീപത്തു നിന്നും പാമ്പിനെ പിടികൂടുന്നത് ഇതാദ്യമാണ്.
പ്രതികരിക്കാൻ ഇവിടെ എഴുതുക