തൃശൂര്‍ :വാല്‍പ്പാറയില്‍ തേയില തോട്ടം തൊഴിലാളികളെ കബളിപ്പിച്ച് പണം തട്ടിയ പ്രതി പിടിയില്‍.എടിഎം കാര്‍ഡ് ഉപയോഗിച്ച് പണം എടുക്കാന്‍ അറിയാത്തവരെ കബളിപ്പിച്ച ആലപ്പുഴ സ്വദേശി നജീബിനെയാണ് പൊലീസ് പിടികൂടിയത്.
ഇയാളുടെ പക്കല്‍ നിന്ന് 44 എടിഎം കാര്‍ഡുകളാണ് പൊലീസ് പിടിച്ചെടുത്തത്. കഴിഞ്ഞ ദിവസം എടിഎം വഴി പണം എടുക്കാനറിയാത്ത വൃദ്ധയെ നജീബ് കബളിപ്പിച്ചതോടെയാണ് കുടുങ്ങിയത്. പണം എടുക്കാന്‍ നജീബിന്റെ സഹായം തേടിയ വൃദ്ധയുടെ പിന്‍ നമ്പര്‍ മനസിലാക്കിയ ശേഷം ഡമ്മി കാര്‍ഡ് നല്‍കി തിരിച്ചയയ്‌ക്കുകയായിരുന്നു ഇയാള്‍.
തിരികെ വീട്ടില്‍ എത്തിയ വൃദ്ധയ്‌ക്ക് 9000 രൂപ പിന്‍വലിച്ചതായി ഫോണില്‍ മെസേജ് കണ്ടപ്പോഴാണ് ചതിവ് പറ്റി എന്ന് മനസിലായത്. ഉടന്‍ തന്നെ പൊലീസില്‍ പരാതി നല്‍കി.
വാല്‍പ്പാറ ഡിഎസ്പി ശ്രീനിധിയുടെ നേതൃത്വത്തിലാണ് നജീബിനെ അറസ്റ്റ് ചെയ്തത്.വാല്‍പ്പാറ തേയില തോട്ടം തൊഴിലാളികള്‍ക്ക് ശമ്പളം കിട്ടുന്ന ദിവസം ഇയാള്‍ വാല്‍പ്പാറയില്‍ എത്തും. പണം എടുക്കാന്‍ അറിയാത്തവര്‍ക്ക് പണം എടുത്തു കൊടുക്കുന്നെന്ന വ്യാജേന എടിഎം കാര്‍ഡ് മാറ്റി ഡമ്മി കാര്‍ഡ് നല്‍കി കബളിപ്പിക്കും. എറണാകുളം പൊലീസ് സ്‌റ്റേഷനില്‍ ഇയാളുടെ പേരില്‍ രണ്ട് കേസുകളുണ്ട്.
പ്രതികരിക്കാൻ ഇവിടെ എഴുതുക: