ഇടുക്കി : വാഹനത്തിന്റെ ബാറ്ററിയില്‍ ഒഴിക്കാന്‍ വച്ചിരുന്ന വെള്ളം മദ്യത്തില്‍ കലര്‍ത്തി കുടിച്ചയാള്‍ മരിച്ചു. വണ്ടിപ്പെരിയാര്‍ സ്വദേശിയായ കല്ലുവേലി പറമ്പില്‍ ജോബി (40) നാണ് മരിച്ചത്. മറ്റൊരാള്‍ ഗുരുതരാവസ്ഥയില്‍ ആശുപത്രിയിലാണ്.
വണ്ടിപ്പെരിയാര്‍ ചുരുക്കളം അപ്പര്‍ ഡിവിഷനില്‍ താമസിക്കുന്ന പ്രതാപ് (39) കഴിഞ്ഞദിവസം തമിഴ്‌നാട്ടിലെ തിരുപ്പൂരില്‍ വച്ച് മഞ്ഞപ്പിത്തം ബാധിച്ച് മരിച്ചിരുന്നു.പ്രതാപിന്റെ മൃതദേഹത്തോടൊപ്പം അനുഗമിച്ചിരുന്നത് ജോബിന്‍, പ്രഭു എന്നിവര്‍ ഉള്‍പ്പെടെ അഞ്ച് പേരാണ് .
വ്യാഴാഴ്ച വെളുപ്പിന് ഒരുമണിയോടുകൂടി ആംബുലന്‍സ് കുമിളിയില്‍ നിര്‍ത്തി മറ്റ് രണ്ടുപേര്‍ ചായ കുടിക്കുന്നതിന് വാഹനത്തില്‍ നിന്നും ഇറങ്ങി. ഈ സമയം ജോബിനും പ്രഭുവും തമിഴ്‌നാട്ടില്‍ വച്ച് കഴിച്ചതിന്റെ ബാക്കി മദ്യം ആംബുലന്‍സിന്റെ ബാറ്ററിയില്‍ ഒഴിക്കാന്‍ വച്ചിരുന്ന വെള്ളം അബദ്ധത്തില്‍ ചേര്‍ത്ത് കുടിക്കുകയായിരുന്നു.
പിന്നാലെ ദേഹാസ്വാസ്ഥ്യം അനുഭവപ്പെട്ട ഇരുവരെയും കുമളിയിലെ സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും ജോബിന്‍ മരിച്ചു. പ്രഭുവിന് പ്രാഥമിക ചികിത്സ നല്‍കിയശേഷം കോട്ടയം മെഡിക്കല്‍ കോളേജ് ആശുപത്രിയില്‍ അത്യാഹിത നിലയില്‍ പ്രവേശിപ്പിച്ചു. സുഹൃത്തിന്റെ മരണാനന്തര ചടങ്ങുകള്‍ക്ക് എത്തിയ ആളും മരിച്ചതിന്റെ ആഘാതത്തിലാണ് വണ്ടിപ്പെരിയാര്‍ ചുരക്കുളം അപ്പര്‍ ഡിവിഷനിലെ താമസക്കാര്‍.
പ്രതികരിക്കാൻ ഇവിടെ എഴുതുക: