ശബരിമല : ശബരിമല സന്നിധാനത്ത് നിന്ന് തിരുട്ട് ഗ്രാമത്തിലെ രണ്ട് മോഷ്ടാക്കളെ പൊലീസ് പിടികൂടി. മോഷണശ്രമത്തിനിടെയാണ് കറുപ്പ് സ്വാമി, വസന്ത് എന്നിവരെ സന്നിധാനം പൊലീസ് പിടികൂടിയത്. കഴിഞ്ഞ ദിവസമാണ് സംശയാസ്പാദമായി കണ്ട ഇരുവരെയും പൊലീസ് ചോദ്യം ചെയ്തത്. നേരത്തെ കേസുകളുള്ളവർ, ശബരിമല സീസണിൽ മോഷ്ടിക്കാൻ എത്തുന്നവർ എന്നിങ്ങനെയുള്ളവരുടെ ഒരു ഡാറ്റ പൊലീസിന്റെ കൈവശമുണ്ട്. അതിൽപ്പെട്ടവരാണ് ഇപ്പോൾ അറസ്റ്റിലായത്.
ഇവർ ജോലിക്കായി എത്തിയെന്നാണ് ചോദ്യം ചെയ്യലിൽ വിശദീകരിച്ചത്. എന്നാൽ ജോലിയുമായി ബന്ധപ്പെട്ട രേഖകൾ ഒന്നും ഇവരുടെ കൈവശമില്ല. ഇവരോട് ശബരിമലയിൽ നിന്ന് മടങ്ങിപ്പോകാൻ പൊലീസ് ആവശ്യപ്പെട്ടിരുന്നു. എന്നാൽ കാട്ടിൽ ഒളിച്ച ഇവർ മോഷണശ്രമം നടത്തുന്നതിനിടെയാണ് പിടികൂടിയതെന്ന് പൊലീസ് പറഞ്ഞു.
