കൊച്ചി: കുറുവ സംഘാംഗമെന്ന സംശയത്തില്‍ കസ്റ്റഡിയിലെടുത്ത മണികണ്ഠനെ പോലീസ് വിട്ടയച്ചു. അറസ്റ്റിലായ കുറുവ സംഘാംഗം സന്തോഷ് സെല്‍വന്റെ അടുത്ത ബന്ധുവാണ് മണികണ്ഠന്‍. സന്തോഷിനൊപ്പം എറണാകുളം കുണ്ടന്നൂര്‍ മരടില്‍ നിന്നാണ് പോലീസ് മണികണ്ഠനെ കസ്റ്റഡിയിലെടുത്തത്.
മണികണ്ഠന്റെ ഫോണ്‍ രേഖകള്‍ പോലീസ് വിശദമായി പരിശോധിച്ചിരുന്നു. കുറുവ സംഘത്തിന്റെ മോഷണത്തില്‍ പങ്കുള്ളതിന് തെളിവില്ലെന്ന് കണ്ടെത്തിയതിനെ തുടര്‍ന്നാണ് മണികണ്ഠനെ വിട്ടയച്ചതെന്ന് പോലീസ് വ്യക്തമാക്കി. എപ്പോള്‍ അറിയിച്ചാലും മരട് പോലീസ് സ്‌റ്റേഷനില്‍ എത്തണമെന്ന് ഇയാള്‍ക്ക് നിര്‍ദേശം നല്‍കിയിട്ടുണ്ട്.
ആലപ്പുഴയില്‍ മോഷണം നടന്ന ഒക്ടോബര്‍ 21 മുതല്‍ നവംബര്‍ 14 വരെ മണികണ്ഠന്‍ കേരളത്തില്‍ ഉണ്ടായിരുന്നില്ലെന്നാണ് പോലീസ് കണ്ടെത്തല്‍. ഇത്രയും ദിവസം മണികണ്ഠന്‍ തമിഴ്‌നാട്ടിലായിരുന്നു. കൂടാതെ, പുന്നപ്രയില്‍ മോഷണം നടന്ന വീട്ടിലെ യുവതിക്ക് മണികണ്ഠനെ തിരിച്ചറിയാനും കഴിഞ്ഞിരുന്നില്ല. എന്നാല്‍ മോഷണങ്ങള്‍ക്ക് ഇയാള്‍ ബാഹ്യ സഹായം ചെയ്തിട്ടുണ്ടോ എന്ന് പോലീസ് പരിശോധിക്കുന്നുണ്ട്. അതേസമയം സന്തോഷ് സെല്‍വനെ കസ്റ്റഡിയില്‍ കിട്ടാന്‍ പോലീസ് പ്രത്യേക അപേക്ഷ ഇന്നു കോടതിയില്‍ സമര്‍പ്പിക്കും. സന്തോഷ് സെല്‍വത്തെ കസ്റ്റഡിയില്‍ വാങ്ങിയ ശേഷം മറ്റു പ്രതികള്‍ക്കായി വിപുലമായ അന്വേഷണത്തിന് ഒരുങ്ങുകയാണ് സ്‌പെഷല്‍ സ്‌ക്വാഡ്.
സന്തോഷ് സെൽവത്തിന്റെ ഭാര്യക്കും അമ്മയ്‌ക്കും എതിരെയും തമിഴ്നാട്ടിൽ മോഷണത്തിന് കേസുകളുണ്ട്.
പ്രതികരിക്കാൻ ഇവിടെ എഴുതുക: