എറണാകുളം: പറവൂരിലെ രണ്ട് സ്‌കൂളുകളില്‍ നിന്ന് വിനോദയാത്ര പോയ 33 കുട്ടികള്‍ക്ക് ഭക്ഷ്യവിഷബാധ. ഗവ.ഹയര്‍സെക്കന്‍ഡറി സ്‌കൂള്‍ പറവൂര്‍, നന്ത്യാട്ടുകുന്നം എസ്എന്‍വി സംസ്‌കൃത ഹയര്‍സെക്കന്‍ഡറി സ്‌കൂള്‍ എന്നിവിടങ്ങളിലെ വിദ്യാര്‍ത്ഥികള്‍ക്കാണ് ഭക്ഷ്യ വിഷബാധ.
ഇവര്‍ പറവൂര്‍ താലൂക്കാശുപത്രിയിലും സ്വകാര്യ ആശുപത്രിയിലുമായി ചികിത്സ തേടി. ഗവ.ഹയര്‍സെക്കന്‍ഡറി സ്‌കൂള്‍ വിദ്യാര്‍ഥികള്‍ കൊടൈക്കനാലിലേക്കും എസ്എന്‍വി സ്‌കൂള്‍ വിദ്യാര്‍ഥികള്‍ ഊട്ടിയിലേക്കുമാണ് വിനോദ യാത്ര പോയത്.
വ്യാഴാഴ്‌ച്ച മടങ്ങിയെത്തിയ രണ്ട് സ്‌കൂളിലെയും വിനോദ യാത്ര സംഘങ്ങള്‍ തൃശൂര്‍ വടക്കാഞ്ചേരിയിലെ ഒരു ഹോട്ടലില്‍ നിന്ന് ഭക്ഷണം കഴിച്ചിരുന്നു. ഗവ.ഹയര്‍സെക്കന്‍ഡറി സ്‌കൂളില്‍ നിന്നു 144 പേര്‍ യാത്ര പോയതില്‍ 15 പേരും എസ്എന്‍വി സ്‌കൂളില്‍ നിന്ന് 252 പേര്‍ പോയതില്‍ 18 പേരുമാണ് ഭക്ഷ്യവിഷബാധ ലക്ഷണങ്ങളോടെ ചികിത്സ തേടിയത്. ഒരു കുട്ടി ഇപ്പോഴും ചികിത്സയിലാണ്. ആരുടെയും നില ഗുരുതരമല്ല.
പ്രതികരിക്കാൻ ഇവിടെ എഴുതുക: