പത്തനംതിട്ട : തീര്ത്ഥാടകര്ക്ക് അടിയന്തര വൈദ്യ സഹായം ഒരുക്കാന് ശബരിമല പാതയില് കനിവ് 108ന്റെ റാപ്പിഡ് ആക്ഷന് മെഡിക്കല് യൂണിറ്റുകള് വിന്യസിച്ചു.ആരോഗ്യ വകുപ്പിന്റെയും കനിവ് 108ന്റെയും ആംബുലന്സുകള്ക്ക് പുറമേയാണ് ഈ യൂണിറ്റുകള് കൂടി സജ്ജമാക്കിയിട്ടുളളത്.
സുസജ്ജമായ ആശുപത്രികള്ക്ക് പുറമേ പമ്പ മുതല് സന്നിധാനം വരെയും കാനനപാതയിലുമായി ആകെ 19 എമര്ജന്സി മെഡിക്കല് സെന്ററുകള്, ഓക്സിജന് പാര്ലറുകള് എന്നിവയും സജ്ജമാക്കിയിട്ടുണ്ട്.
ഇടുങ്ങിയ പാതകളില് സഞ്ചരിക്കാന് കഴിയുന്ന ബൈക്ക് ഫീഡര് ആംബുലന്സ്, ദുര്ഘട പാതകളില് സഞ്ചരിക്കാന് കഴിയുന്ന റെസ്ക്യു വാന്, ഐസിയു ആംബുലന്സ് എന്നിവയാണ് തീര്ത്ഥാടകര്ക്കായി സജ്ജമാക്കിയത്. കനിവ് 108 ആംബുലന്സ് പദ്ധതിക്ക് കീഴില് പമ്പ ആശുപത്രി കേന്ദ്രീകരിച്ചാണ് റാപ്പിഡ് ആക്ഷന് മെഡിക്കല് യൂണിറ്റ് പ്രവര്ത്തിക്കുന്നത്.
വൈദ്യസഹായം ആവശ്യമുളളപ്പോള് 108 എന്ന ടോള് ഫ്രീ നമ്പറിലേക്ക് ബന്ധപ്പെട്ടാല് ഈ വാഹനങ്ങളുടെ സേവനം ലഭ്യമാകും. ഇത് കൂടാതെ അടിയന്തര വൈദ്യ സഹായത്തിന് 04735 203232 എന്ന നമ്പരിലും വിളിക്കാവുന്നതാണ്.
ഒരു രോഗിയെ കിടത്തികൊണ്ട് പോകാന് സാധിക്കുന്ന തരത്തില് സജ്ജമാക്കിയ സൈഡ് കാറോടു കൂടിയതാണ് ബൈക്ക് ഫീഡര് ആംബുലന്സ്. രോഗികളെ പരിചരിക്കുന്നതിന് പ്രത്യേക പരിശീലനം കിട്ടിയിട്ടുളള ഒരു എമര്ജന്സി മെഡിക്കല് ടെക്നീഷ്യന് ആയിരിക്കും ഈ വാഹനം നിയന്ത്രിക്കുന്നത്.
