ടോക്കിയോ: രണ്ടാം റൗണ്ടില് കനേഡിയന് താരം മിഷേല് ലിയോട് തോറ്റ് കുമാമോട്ടോ മാസ്റ്റേഴ്സ് ജപ്പാന് സൂപ്പര് 500 ബാഡ്മിന്റണ് ടൂര്ണമെന്റില് നിന്ന് ഭാരതത്തിന്റെ പി.വി. സിന്ധു പുറത്തായി. ഇന്നലെ നടന്ന പോരാട്ടത്തില് ആദ്യ ഗെയിം നേടിയതിന് പിന്നാലെ രണ്ട് ഗെയിമുകള് നഷ്ടപ്പെടുത്തിയാണ് സിന്ധുവിന്റെ പുറത്താകല്. സ്കോര് 21-17, 16-21, 17-21.
ഇന്നലത്തെ മത്സരത്തിന് മുമ്പ് രണ്ട് തവണ മാത്രമേ ഈ കനേഡിയന് താരത്തിന് സിന്ധുവിനെ തോല്പ്പിക്കുവാന് കഴിഞ്ഞിരുന്നുള്ളൂ. താരത്തിനെതിരെ 10 മത്സരം സ്വന്തമാക്കിയ ആത്മവിശ്വാസം ഉണ്ടായിട്ടുകൂടി സിന്ധുവിന് ഇന്നലെ വിജയിക്കാനായില്ല.
ഈ മത്സരത്തോടെ ടൂര്ണമെന്റിലെ ഭാരത പ്രതീക്ഷകളെല്ലാം അവസാനിച്ചു. പുരുഷ സിംഗിള്സില് മത്സരിച്ച ലക്ഷ്യ സെനും വനിതാ ഡബിള്സില് പോരടിച്ച ട്രീസ ജോളി-ഗോയത്രി ഗോപീചന്ദ് സഖ്യവും നേരത്തെ തന്നെ പുറത്തായിരുന്നു.
