വയനാട്: കല്‍പ്പറ്റയില്‍ വന്‍ കഞ്ചാവ് വേട്ട. വില്‍പ്പനയ്‌ക്കായി സൂക്ഷിച്ചിരുന്ന കഞ്ചാവാണ് പിടികൂടിയത്. 10 കിലോയോളം തൂക്കം വരുന്ന കഞ്ചാവുമായി കല്‍പറ്റ ടൗണില്‍ നിന്ന് ഒരാളെ പിടികൂടി. മേപ്പാടി, കള്ളാടി, നെല്ലിപ്പറമ്പില്‍ വീട്ടില്‍ അനില്‍ കുമാര്‍ എന്ന അനീസ്(50) നെയാണ് ജില്ലാ നര്‍ക്കോട്ടിക് സെല്‍ ഡി.വൈ.എസ്.പി ജോഷി ജോസിന് കീഴിലെ ലഹരിവിരുദ്ധ സ്‌ക്വാഡ് വ്യാഴാഴ്ച പുലര്‍ച്ചയോടെ പിടികൂടിയത്.
പിടിയിലായ അനീസ് വയനാട് ജില്ലയിലും പുറത്തുമായി നിരവധി മോഷണകേസുകളില്‍ പ്രതിയാണ്. ദീര്‍ഘകാലം ജയില്‍ ശിക്ഷ അനുഭവിച്ചിരുന്ന ഇയാള്‍ ശിക്ഷ കഴിഞ്ഞ് അടുത്തിടെയാണ് പുറത്തിറങ്ങിയത്. ഇതോടെ പൊലീസ് നിരീക്ഷിച്ചു വരികയായിരുന്നു. കല്‍പറ്റ ടൗണില്‍ പുതിയ സ്റ്റാന്‍ഡിന് സമീപം വച്ച് ട്രോളി ബാഗുമായി സംശയാസ്പദമായി കണ്ട ഇയാളെ ഡാന്‍സാഫ് എസ്.ഐ എന്‍.വി ഹരീഷ് കുമാറിന്റെയും കല്‍പറ്റ പൊലീസ് സ്റ്റേഷന്‍ സബ് ഇന്‍സ്പെക്ടര്‍ എം. സജി ഷിനോബിന്റെയും നേതൃത്വത്തിലുള്ള സംഘം പിടികൂടുകയായിരുന്നു. തുടര്‍ന്ന് പരിശോധന നടത്തിയപ്പോഴാണ് 9.58 കിലോ കഞ്ചാവ് കണ്ടെടുക്കുന്നത്.
പ്രതികരിക്കാൻ ഇവിടെ എഴുതുക