പാലക്കാട്: പ്രായപൂര്ത്തിയാകാത്ത ആണ്കുട്ടിയെ പ്രകൃതിവിരുദ്ധ ലൈംഗിക പീഡനത്തിനിരയാക്കിയ കേസില് പ്രതിക്ക് 30 വര്ഷം കഠിനതടവും 65,000 രൂപ പിഴയും ശിക്ഷ. പുതുനഗരം സത്രവട്ടാരം മുഹമ്മദ് നിജാ(26) മിനാണ് പാലക്കാട് ഫാസ്റ്റ് ട്രാക്ക് സ്പെഷ്യല് പോക്സോ കോടതി ജഡ്ജി ടി സഞ്ജു വിവിധ വകുപ്പുകള് പ്രകാരം ശിക്ഷ വിധിച്ചത്. പിഴ അടക്കാത്ത പക്ഷം ആറു മാസം അധിക കഠിനതടവ് അനുഭവിക്കണം. 2017 ലാണ് കേസിനാസ്പദമായ സംഭവം.
സ്കൂളിലേക്ക് വരികയായിരുന്ന ആണ്കുട്ടിക്ക് ഭക്ഷണവും ഐസ്ക്രീമും വാങ്ങിച്ചുകൊടുത്ത് പ്രലോഭിപ്പിച്ച് കൊണ്ടുപോയി പ്രകൃതിവിരുദ്ധ ലൈംഗിക പീഡനം നടത്തി എന്നാണ് പ്രോസിക്യൂഷന് വാദം. പുതുനഗരം പോലീസ് രജിസ്റ്റര് ചെയ്ത കേസ് അന്നത്തെ ആലത്തൂര് ഡിവൈഎസ്പിമാരായിരുന്ന പി ശശികുമാര്, എസ് ഷംസുദ്ദീന്, വി.എ കൃഷ്ണദാസ് എന്നിവര് അന്വേഷണം നടത്തി കുറ്റപത്രം സമര്പ്പിച്ചു. പ്രോസിക്യൂഷന് വേണ്ടി സ്പെഷ്യല് പബ്ലിക് പ്രോസിക്ക്യൂട്ടര് സി. രമിക ഹാജരായി. പിഴത്തുക കൂടാതെ ഇരയ്ക്ക് അധിക ധനസഹായത്തിനും വിധിയുണ്ട്.
