തിരുവനന്തപുരം: 70 വയസുകഴിഞ്ഞവര്ക്കുള്ള കേന്ദ്രസര്ക്കാരിന്റെ വയോജന ആരോഗ്യ ഇന്ഷുറന്സ് പദ്ധതിക്ക് കേരളത്തില് മികച്ച പ്രതികരണം. സംസ്ഥാനത്ത് നാല് ലക്ഷത്തിലധികം പേരാണ് രജിസ്ട്രേഷന് പൂര്ത്തിയാക്കിയത്. ഉപയോക്താക്കള്ക്ക് ഈ മാസം തന്നെ ഇന്ഷുറന്സ് പദ്ധതിയുടെ പ്രയോജനം ലഭിച്ചു തുടങ്ങും.
നിലവില് കാരുണ്യാ പദ്ധതിയില് എംപാനല് ചെയ്തിരിക്കുന്ന ആശുപത്രികള് ആയുഷ്മാന് ഭാരതിന്റെ ഭാഗമാകും. 202 സര്ക്കാര് ആശുപത്രികളും 386 സ്വകാര്യ ആശുപത്രികളും കാരുണ്യയുടെ ഭാഗമാണ്. അഞ്ച് ലക്ഷം രൂപയുടെ ആരോഗ്യ ഇന്ഷുറന്സ് പരിരക്ഷ കേരളത്തിലെ 26 ലക്ഷം വയോധികര്ക്കാണ് ലഭിക്കുക. 70 വയസു കഴിഞ്ഞവരുടെ വിശദാംശങ്ങള് പരിശോധിച്ചാണ് കേന്ദ്രം എണ്ണം നിശ്ചയിച്ചത്. ഇത്രയും പേരുടെ ചികിത്സാച്ചെലവില് 60% കേന്ദ്രവും 40% കേരളവും വഹിക്കും. സാമ്പത്തിക, സാമൂഹിക സ്ഥിതി നോക്കാതെ 70 കഴിഞ്ഞ എല്ലാവരെയും പദ്ധതിയുടെ ഭാഗമാക്കുമെന്നതാണ് പ്രധാന സവിശേഷത.
അതിനിടെ, ആയുഷ്മാന് പദ്ധതിക്കെതിരെ നിരവധി വ്യാജപ്രചരണങ്ങളാണ് നടക്കുന്നത്. സാമ്പത്തിക പ്രതിസന്ധി കാരണം കേരളം പദ്ധതിയില് നിന്ന് മാറിനില്ക്കുകയാണെന്നും മറ്റുമുള്ള പ്രചാരണം തെറ്റാണെന്നും തമിഴ്നാടുപോലെ സംസ്ഥാനതല ഇന്ഷുറന്സ് പദ്ധതികളുള്ള പല സംസ്ഥാനങ്ങളും ആയുഷ്മാന് ഭാരതിന്റെ പ്രാരംഭപ്രവര്ത്തനങ്ങളില് കേരളത്തെക്കാള് പിന്നിലാണെന്നും ഔദ്യോഗികവൃത്തങ്ങള് വ്യക്തമാക്കി.
70 കഴിഞ്ഞവരുടെ രജിസ്ട്രേഷന്
ദേശീയ ആരോഗ്യ അതോറിറ്റിയുടെ വെബ്സൈറ്റിലോ (www.beneficiary.nha.gov.in) ആയുഷ്മാന് ഭാരതിന്റെ മൊബൈല് ആപ്ലിക്കേഷനിലോ രജിസ്റ്റര് ചെയ്യാം. ആധാര്, ആധാറുമായി ബന്ധിപ്പിച്ച മൊബൈല് നമ്പര് എന്നിവ നിര്ബന്ധമാണ്. രജിസ്ട്രേഷന് നടപടികളുടെ ഭാഗമായി ആധാറുമായി ബന്ധപ്പെടുത്തിയിരിക്കുന്ന മൊബൈല് നമ്പറിലേക്ക് ഒടിപി വരും.
