കൊച്ചി: സംസ്ഥാന സ്കൂള് അത്ലറ്റിക്സിലെ അവസാനദിനമായ ഇന്നലെ നടന്ന 200 മീറ്റര് ഗ്ലാമര് ഇനത്തില് ആവേശ പോരാട്ടം അരങ്ങേറി. ട്രാക്കില് മിന്നിത്തിളങ്ങിയ മത്സരത്തില് ജൂനിയര് താരങ്ങള് സ്പ്രിന്റ് ഡബിള് തികച്ചു.
ആണ്കുട്ടികളില് ജെ. നിവേദ്കൃഷ്ണയും പെണ്കുട്ടികളില് ആര്. ശ്രേയയുമാണ് സ്പ്രിന്റ് ഡബിള് തികച്ചത്. പാലക്കാട് ചിറ്റൂര് ജിഎച്ച്എസ്എസിലെ ജെ. നിവേദ് കൃഷ്ണ 22.31 സെക്കന്ഡില് ഫിനിഷ് ചെയ്താണ് ഇന്നലെ സ്പ്രിന്റ് ഡബിള് തികച്ചത്. കഴിഞ്ഞ ദിവസം 100 മീറ്ററില് 10.98 സെക്കന്ഡിലായിരുന്നു താരത്തിന്റെ ഫിനിഷിങ്. 200ല് വെള്ളിനേട്ടത്തിന് ഉടമയായ മലപ്പുറം തിരുനാവായ നവാമുകുന്ദയിലെ ഫസലുല്ഹഖ് 22.58 സെക്കന്ഡില് ഫിനിഷ് ചെയ്തപ്പോള് വെങ്കലം സ്വന്തമാക്കിയ തിരുവനന്തപുരം ജി.വി. രാജയിലെ കെ.പി. വിനായക് 22.66 സെക്കന്ഡിലാണ് ഓട്ടം പൂര്ത്തിയാക്കിയത്. ഈ വിഭാഗം പെണ്കുട്ടികളില് ആലപ്പുഴ സെന്റ് ജോസഫ്സ് ഹയര് സെക്കന്ഡറി സ്കൂളിലെ ആര്. ശ്രേയയും സ്പ്രിന്റ് ഡബിള് സ്വന്തമാക്കി. 25.53 സെക്കന്ഡിലാണ് താരം ഫിനിഷ് ലൈന് കടന്നത്. തിരുവനന്തപുരം സായിയിലെ അനന്യ സുരേഷ് 25.70 വെള്ളിയും, തൃശൂര് ആളൂര് ആര്എം ഹയര്സെക്കന്ഡറിയിലെ സി.എസ്. ആന്മരിയ (26.41) വെങ്കലവും നേടി. സീനിയര് ആണ്കുട്ടികളില് കോതമംഗലം മാര്ബേസിലിന്റെ ജസീം ജെ. റസാഖിനാണ് സ്വര്ണം. 21.83 സെക്കന്ഡില് ഫിനീഷ് ചെയ്താണ് ജസീം പൊന്നണിഞ്ഞത്. 400 മീറ്ററില് വെള്ളി നേടിയ ജസീം തുടര്ച്ചയായി മൂന്നാം തവണയാണ് 200 മീറ്ററില് സ്വര്ണത്തില് മുത്തമിടുന്നത്. പരിക്കിനെ തുടര്ന്ന് 100 മീറ്ററിലെ ജേതാവ് അന്സ്വാഫ് അഷ്റഫ് 200ല് മത്സരിച്ചില്ല. സീനിയര് പെണ്കുട്ടികളില് ഫോട്ടോ ഫിനിഷില് ജ്യോതിക ജേതാവായി.
