മുംബൈ: ഭരണഘടന ഉയര്ത്തിക്കാട്ടി രാഹുല് ഗാന്ധി മഹാരാഷ്ട്രയില് നടത്തിയ പ്രചാരണം ആവര്ത്തിക്കരുതെന്നും സമുദായസ്പര്ധ വളര്ത്താന് ശ്രമിക്കുന്നതിന് രാഹുല് ഗാന്ധിയ്ക്കെതിരെ ഭാരതീയ ന്യായ് സംഹിതയിലെ 353ാം വകുപ്പ് പ്രകാരം കേസെടുക്കണമെന്നും ബിജെപി. ഇക്കാര്യം ആവശ്യപ്പെട്ട് ബിജെപി സംഘം കേന്ദ്രമന്ത്രി കൂടിയ അര്ജുന് രാം മേഘ് വാളിന്റെ നേതൃത്വത്തില് മഹാരാഷ്ട്രയില് തെരഞ്ഞെടുപ്പ് കമ്മീഷനെ കണ്ട് പരാതി നല്കി.
“ആര്എസ്എസുമായി ചേര്ന്ന് ബിജെപി ഇന്ത്യന് ഭരണഘടന ഇല്ലാതാക്കാന് ശ്രമിക്കുന്നു എന്നാണ് രാഷ്ട്രീയ വേദികളില് ഭരണഘടന ഉയര്ത്തിപ്പിടിച്ച് രാഹുല് ഗാന്ധി സമര്ത്ഥിക്കാന് ശ്രമിക്കുന്നത്. അംബേദ്കറുടെ ഭരണഘടന സ്നേഹവും തുല്യതയും ബഹുമാനവും വളര്ത്തുമ്പോള് ബിജെപി അതിനെ നശിപ്പിക്കാന് ശ്രമിക്കുന്നു എന്നാണ് രാഹുല് ഗാന്ധി ആരോപിക്കുന്നത്. ഇത് നുണയാണ്.എത്ര പറഞ്ഞിട്ടും ശാസിച്ചിട്ടും രാഹുല് ഗാന്ധി ഈ പ്രചാരണരീതിയില് നിന്നും പിന്മാറാന് തയ്യാറാകുന്നില്ല. അതിനാലാണ് തെരഞ്ഞെടുപ്പ് കമ്മീഷനെ സമീപിക്കുന്നത്. “- ബിജെപി പറയുന്നു.
“സംസ്ഥാനങ്ങളെ തമ്മിലടിപ്പിക്കാനും രാഹുല് ഗാന്ധി പ്രസംഗത്തിലൂടെ ശ്രമിക്കുന്നു. നവമ്പര് ആറിന് മഹാരാഷ്ട്രയില് നടത്തിയ പ്രസംഗത്തില് രാഹുല് ഗാന്ധി വീണ്ടും സംസ്ഥാനങ്ങളെ തമ്മിലടിപ്പിക്കാന് ഉതകുന്ന നുണ പറഞ്ഞിരുന്നു. മഹാരാഷ്ട്രയില് വരേണ്ട ആപ്പിള് ഐ ഫോണ് നിര്മ്മാണക്കമ്പനിയും ബോയിങ് ഫാക്ടറിയും മറ്റ് സംസ്ഥാനങ്ങളിലേക്ക് പോയി എന്നാണ് രാഹുല് നടത്തിയ നുണപ്രസംഗം. ഇത് സംസ്ഥാനങ്ങളെ തമ്മിലടിപ്പിക്കുന്ന നുണയാണ്. ഇത് തെരഞ്ഞെടുപ്പ് ചട്ടങ്ങളുടെ ലംഘനമാണ്. രാഹുല് ഗാന്ധിയ്ക്കെതിരെ കേസെടുക്കണം.”- തെരഞ്ഞെടുപ്പ് കമ്മീഷനെ കണ്ട ബിജെപി സംഘത്തിന്റെ നേതാവും കേന്ദ്രമന്ത്രിയുമായ അര്ജുന് രാം മേഘ് വാള് പരാതിപ്പെട്ടു.
