മലപ്പുറം:തിരൂരിലെ ഡെപ്യൂട്ടി തഹസില്‍ദാര്‍ പി.ബി. ചാലിബിനെ കാണാതായതിന് പിന്നില്‍ ബ്ലാക്‌മെയിലിംഗെന്ന് പൊലീസ്. സംഭവത്തില്‍ മൂന്ന് പേരെ തിരൂര്‍ പൊലീസ് പിടികൂടി.രണ്ടത്താണി സ്വദേശികളായ ഷഫീഖ് (35),ഫൈസല്‍ (43) വെട്ടിച്ചിറ സ്വദേശി അജ്മല്‍ (37) എന്നിവരാണ് പിടിയിലായത്.
ഇവരെ ചോദ്യം ചെയ്തുവരികയാണ്.പോക്‌സോ കേസില്‍പ്പെടുത്തി കുടുംബം നശിപ്പിക്കുമെന്ന് ഭീഷണിപ്പെടുത്തി 10 ലക്ഷം രൂപ പ്രതികള്‍ തട്ടിയെടുത്തെന്നാണ് ചാലിബ് മൊഴി നല്‍കിയത്
കഴിഞ്ഞ ബുധനാഴ്ച മുതലാണ് ചാലിബിനെ കാണാതായത്. വൈകുന്നേരം ഓഫീസില്‍ നിന്ന് ഇറങ്ങിയ ചാലിബ് വീട്ടിലെത്താന്‍ വൈകുമെന്ന് ഭാര്യയെ വിളിച്ച് അറിയിച്ചിരുന്നു. രാത്രി എട്ടിന് വീണ്ടും അന്വേഷിച്ചപ്പോള്‍ വളാഞ്ചേരി ഭാഗത്തുണ്ടെന്നും പൊലീസും എക്‌സൈസുമായി പരിശോധനയുള്ളതിനാല്‍ വീട്ടിലെത്താന്‍ വൈകുമെന്നും അറിയിച്ചു.
പിന്നീട് വിളിച്ചപ്പോഴൊന്നും ഫോണില്‍ ലഭ്യമായില്ല. തുടര്‍ന്ന് കുടുംബം പൊലീസില്‍ പരാതി നല്‍കി. പൊലീസ് അന്വേഷണം ശക്തമാക്കുന്നതിനിടെ ചാലിബ് വെള്ളിയാഴ്ച ഭാര്യയുമായി ഫോണില്‍ ബന്ധപ്പെട്ടിരുന്നു. പിന്നീട് വെള്ളിയാഴ്ച രാത്രി 11ഓടെ വീട്ടിലെത്തി.
പ്രതികരിക്കാൻ ഇവിടെ എഴുതുക: