തിരുവനന്തപുരം: പാലക്കാട് നിന്നും തിരുവനന്തപുരത്തേക്ക് പോകുന്ന ട്രെയിനുകളില് ബോംബ് വച്ചിട്ടുണ്ടെന്ന് ഭീഷണിപ്പെടുത്തിയ വ്യക്തിയെ പൊലീസ് കസ്റ്റഡിയിലെടുത്തു. പത്തനംതിട്ട കോയിപ്പുറം സ്വദേശി ഹരിലാല് ആണ് ഭീഷണി മുഴക്കിയത് .മദ്യലഹരിയിലാണ് ഇയാള് ബോംബ് ഭീഷണി മുഴക്കിയത്.
ചൊവ്വാഴ്ച രാവിലെ ഇയാള് പൊലീസ് കണ്ട്രോള് റൂമില് വിളിച്ചിരുന്നു. തന്റെ പണം മുഴുവന് പോയെന്നായിരുന്നു പറഞ്ഞത്. എന്നാല് പൊലീസ് അന്വേഷിച്ചപ്പോഴാണ് കാശ് പോയിട്ടില്ലെന്നും മദ്യലഹരിയിലാണെന്നും വ്യക്തമായത്.
യാത്ര ചെയ്യുന്നതിനിടെയാണ് പിന്നീട് മൂന്ന് ട്രെയിനുകളില് ബോംബ് വെച്ചെന്ന് ഭീഷണി സന്ദേശമയച്ചത്. പൊലീസ് ആസ്ഥാനത്ത് വിളിക്കുന്നതിന് മുമ്പ് ഇയാള് കൊച്ചി കണ്ട്രോള് റൂമിലും വിളിച്ചിരുന്നു. സൗത്ത് റെയില്വേ സ്റ്റേഷനിലെ തട്ടുകടയില് ജോലിക്ക് വന്നയാളാണ് ഹരിലാല് എന്നാണ് അറിയുന്നത്.
ഭീഷണിയെ തുടര്ന്ന് ആര് പി എഫ് ട്രെയിനുകളില് പരിശോധന നടത്തി.
