കണ്ണൂര്: എഡിഎം നവീന് ബാബുവിന്റെ മരണത്തില് റിമാന്ഡിലായ മുന് ജില്ലാ പഞ്ചായത്ത് പ്രസിഡന്റ് പി.പി. ദിവ്യയുടെ ജാമ്യഹര്ജിയില് ഇന്ന് തലശ്ശേരി കോടതി വാദം കേള്ക്കും. ഹര്ജിയില് നവീന് ബാബുവിന്റെ ഭാര്യ മഞ്ജുഷ കക്ഷി ചേരും. കോടതി മുന്കൂര് ജാമ്യഹര്ജി തള്ളിയതിന് പിന്നാലെയാണ് ഏതാനും ദിവസം മുമ്പ് ദിവ്യ അന്വേഷണ സംഘത്തിന് മുന്നില് കീഴടങ്ങിയത്.
14 ദിവസത്തേക്ക് റിമാന്ഡ് ചെയ്യപ്പെട്ട ദിവ്യ പള്ളിക്കുന്ന് സെന്ട്രല് ജയില് വളപ്പിലെ വനിതാ ജയിലിലാണ്. കെ. വിശ്വനാണ് ദിവ്യക്കു വേണ്ടി പ്രിന്സിപ്പല് സെഷന്സ് കോടതിയില് ജാമ്യഹര്ജി സമര്പ്പിച്ചത്.
ദിവ്യയെ പോലീസ് കസ്റ്റഡിയില് വാങ്ങി അന്വേഷണസംഘം കഴിഞ്ഞദിവസം ചോദ്യം ചെയ്തിരുന്നു. കഴിഞ്ഞ രണ്ടിന് രാവിലെ മുതല് ആറ് മണിക്കൂറാണ് കോടതി ദിവ്യയെ പോലീസ് കസ്റ്റഡിയില് വിട്ടത്. വൈകുന്നേരം ദിവ്യയെ തിരികെ കണ്ണൂര് ചീഫ് ജുഡീഷ്യല് മജിസ്ട്രേറ്റ് കോടതിയില് ഹാജരാക്കി. വൈകുന്നേരം നാലരയോടെ വീണ്ടും ജയിലിലടയ്ക്കുകയായിരുന്നു. കണ്ണൂര് എസിപി: രത്നകുമാറിന്റെ നേതൃത്വത്തിലായിരുന്നു ചോദ്യംചെയ്യല്.
