തൃശൂര്‍: ബി ജെ പി ഓഫീസ് സെക്രട്ടറി സ്ഥാനത്ത് നിന്ന് സാമ്പത്തിക ക്രമക്കേടിന് പുറത്താക്കിയ തിരൂര്‍ സതീഷിന്റെ വെളിപ്പെടുത്തലിന് പിന്നില്‍ മുട്ടില്‍ മരം മുറികേസ് പ്രതി ആന്റോ അഗസ്റ്റിനാണെന്ന് ശോഭ സുരേന്ദ്രന്‍. തിരൂര്‍ സതീഷിനെ ഇറക്കാന്‍ ആന്റോ ഗൂഢാലോചന നടത്തി. തനിക്കെതിരായ ആരോപണങ്ങളില്‍ തെളിവ് ഉണ്ടെങ്കില്‍ പുറത്തുവിടാനും ശോഭ വെല്ലുവിളിച്ചു.
തന്നെ ആത്മഹത്യയിലേക്ക് തള്ളിവിടാന്‍ ഇല്ലാക്കഥകള്‍ പ്രചരിപ്പിക്കുകയാണ്. ആന്റോഅഗസ്റ്റിനെതിരെ മാനനഷ്ടക്കേസ് നല്‍കുമെന്നും ശോഭ സുരേന്ദ്രന്‍ കൂട്ടിച്ചേര്‍ത്തു. വാര്‍ത്താസമ്മേളനത്തില്‍ സംസാരിക്കുകയായിരുന്നു അവര്‍.
പൊന്നാനി പീഡനക്കേസ് കെട്ടിച്ചമച്ചതാണ്. പൊലീസുകാര്‍ക്കെതിരെ ആരോപണം ഉന്നയിക്കാന്‍ 10 ലക്ഷം രൂപ നല്‍കിയെന്ന് ശോഭ ആരോപിച്ചു. താന്‍ ആന്റോക്കിട്ട പേര് മരംകൊത്തി എന്നാണ്. ആന്റോയുടെ സുഹൃത്ത് കാര്‍വാര്‍ എംഎല്‍എ പരപ്പന അഗ്രഹാര ജയിലില്‍ ആണിപ്പോള്‍.
എങ്ങനെയാണോ പി പി ദിവ്യ നവീന്‍ ബാബുവിനെ ആത്മഹത്യയിലേക്ക് നയിച്ചത്, അതുപോലെ ശോഭ സുരേന്ദ്രനെ ആത്മഹത്യയിലേക്ക് തളളി വിടാന്‍ സ്വന്തം ചാനലിനെ ആന്റോ അഗസ്റ്റിന്‍ ഉപയോഗിച്ചെന്ന് ശോഭ സുരേന്ദ്രന്‍ പറഞ്ഞു. ബിജെപി പ്രവേശനം ആവശ്യപ്പെട്ട് ആന്റോ അഗസ്റ്റിന്‍ സമീപിച്ചിരുന്നുവെന്നും ശോഭ സുരേന്ദ്രന്‍ പറഞ്ഞു.
തിരൂര്‍ സതീശന്റെ വീട്ടില്‍ ഇതുവരെയും പോയിട്ടില്ല.അദ്ദേഹം പുറത്ത് വിട്ട ഫോട്ടോ വ്യാജമാണെന്നും ശോഭ സുരേന്ദ്രന്‍ പറഞ്ഞു.സതീഷിന്റെ വീടല്ല തന്റെ മൂത്ത സഹോദരിയുടെ വീടാണ് ഫോട്ടോയില്‍ കാണുന്നത്. ഒന്നര രണ്ട് വര്‍ഷം മുമ്പുള്ള ഫോട്ടോയാണ് മാധ്യമങ്ങള്‍ക്ക് മുന്നില്‍ സതീഷ് കൊണ്ടുവന്നത്.
തന്റെ വെളിപ്പെടുത്തലുകള്‍ ശോഭ സുരേന്ദ്രന്‍ പറഞ്ഞിട്ടാണെന്നാണ് തിരൂര്‍ സതീഷന്റെ വാദം. ഇതിനെയാണ് ശോഭ സുരേന്ദ്രന്‍ തളളിക്കളഞ്ഞതും പിന്നില്‍ ആന്റോ അഗസ്റ്റിനാണെന്നും വെളിപ്പെടുത്തിയത്.ശോഭ സുരേന്ദ്രനെതിരായ ആരോപണങ്ങള്‍ തരിമ്പും വിശ്വസിക്കുന്നില്ലെന്ന് ബി ജെ പി സംസ്ഥാന അധ്യക്ഷന്‍ കെ സുരേന്ദ്രനും വ്യക്തമാക്കി.
പ്രതികരിക്കാൻ ഇവിടെ എഴുതുക: