എറണാകുളം : ഒളിമ്പിക്സ് മാതൃകയില് സംസ്ഥാന സ്കൂള് കായികമേളയ്ക്ക് തുടക്കം. മഹാരാജാസ് കോളേജ് മൈതാനത്ത് കായിക മേളയ്ക്ക് ഔദ്യോഗിക തുടക്കം കുറിച്ചുകൊണ്ട് ഒളിമ്പ്യന് പിആര് ശ്രീജേഷ് ദീപശിഖ തെളിച്ചു. നടന് മമ്മൂട്ടിയും മുഖ്യാതിഥിയായി . മേളയുടെ സാംസ്കാരിക പരിപാടിയുടെ ഉദ്ഘാടനം മമ്മൂട്ടി നിര്വഹിച്ചു. കായികമേളയുടെ ഉദ്ഘാടനം വിദ്യാഭ്യാസ മന്ത്രി വി ശിവന്കുട്ടി നിര്വഹിച്ചു.
ചൊവ്വാഴ്ച മുതല് ഈ മാസം 11 വരെ കൊച്ചിയിലെ 17 വേദികളിലായാണ് കായികമേള. 20,000 താരങ്ങള് മേളയില് പങ്കെടുക്കും.
സംസ്ഥാന സ്കൂള് കായികമേളയിലെ കുഞ്ഞുങ്ങളെ കാണുമ്പോള് തന്റെ കുട്ടിക്കാലം ഓര്ക്കുന്നുവെന്ന് മമ്മൂട്ടി പറഞ്ഞു. കഥ പറയുമ്പോളിലെ അശോക് രാജിനെപ്പോലെ കുട്ടിക്കാലം ഓര്ക്കുന്നു. എനിക്കും ഇങ്ങനെയൊക്കെ ആകമായിരുന്നുവെന്ന് ഓര്ക്കുന്നു. എനിക്ക് നിങ്ങളില് ഒരുപാട് പ്രതീക്ഷയുണ്ട്.
ദീപശിഖ സ്റ്റേഡിയത്തില് വെച്ച് ഹൈജമ്പ് താരം ജുവല് തോമസ് ഏറ്റുവാങ്ങി. തുടര്ന്ന് വനിത ഫുട്ബോള് താരങ്ങളായ അഖില, ശില്ജി ഷാജ, സ്പെഷ്യല് വിദ്യാര്ത്ഥികളായ യശ്വിത എസ്, അനു ബിനു എന്നിവര്ക്ക് ദീപശിഖ കൈമാറി. ഇവരില് നിന്നും മന്ത്രി ശിവന്കുട്ടി, പിആര് ശ്രീജേഷ് എന്നിവര്് ദീപശിഖ ഏറ്റുവാങ്ങി. ഇതിനുശേഷം മൈതാനത്ത് സജ്ജമാക്കിയ മേളയുടെ ഭാഗ്യ ചിഹ്നം തക്കുടുവിന്റെ(അണ്ണാന്) കൈകളിലുള്ള വലിയ ദീപശിഖ പിആര് ശ്രീജേഷ് തെളിച്ചു. സ്പെഷ്യല് സ്കൂള് വിദ്യാര്ത്ഥി ശ്രീലക്ഷ്മിക്കൊപ്പമാണ് ശ്രീജേഷ് ദീപശിഖ തെളിച്ചത്.
മഹാരാജാസ് കോളേജിലെ സിന്തറ്റിക് ട്രാക്കില് മാര്ച്ച് പാസ്റ്റും നടന്നു. ഗള്ഫിലെ കേരള സിലബസ് പഠിക്കുന്ന വിദ്യാര്ത്ഥികളും ഭിന്നശേഷി വിദ്യാര്ത്ഥികളും മേളയില് പങ്കെടുക്കുന്നു എന്നതാണ് സ്കൂള് ഒളിമ്പിക്സിന്റെ പ്രത്യേകത.
പഴയിടം മോഹനന് നമ്പൂതിരിയുടെ നേതൃത്വത്തില് മേളയ്ക്കായുള്ള പ്രധാന പാചകപ്പുരയും മഹാരാജാസ് കോളേജ് മൈതാനത്ത് പ്രവര്ത്തനം തുടങ്ങി.
