ന്യൂഡല്ഹി: പ്രമുഖ സാമ്പത്തിക വിദഗ്ധനും പ്രധാനമന്ത്രി നരേന്ദ്ര മോദിയുടെ സാമ്പത്തിക ഉപദേശക സമിതി മേധാവിയുമായ ബിബേക് ഡെബ്രോയ് (69) അന്തരിച്ചു. കുടൽ സംബന്ധമായ അസുഖത്തെ തുടർന്ന് ഇന്ന് രാവിലെ 7 മണിക്ക് ഡൽഹിയിലെ എയിംസിൽ വെച്ചായിരുന്നു അന്ത്യം.
”ഡോ. ബിബേക് ദെബ്രോയ് ജി ഒരു ഉന്നത പണ്ഡിതനായിരുന്നു, സാമ്പത്തിക ശാസ്ത്രം, ചരിത്രം, സംസ്കാരം, രാഷ്ട്രീയം, ആത്മീയത തുടങ്ങിയ വൈവിധ്യമാർന്ന മേഖലകളിൽ അവഗാഹം നേടിയിരുന്നു. തന്റെ കൃതികളിലൂടെ അദ്ദേഹം ഇന്ത്യയുടെ ബൗദ്ധിക ഭൂപ്രകൃതിയിൽ മായാത്ത മുദ്ര പതിപ്പിച്ചു. പൊതുനയത്തിനുള്ള അദ്ദേഹത്തിന്റെ സംഭാവനകൾക്കപ്പുറം, നമ്മുടെ പുരാതന ഗ്രന്ഥങ്ങൾ യുവാക്കൾക്ക് പ്രാപ്യമാക്കുന്നതിന് പ്രവർത്തിക്കുന്നതും അദ്ദേഹം ആസ്വദിച്ചു.” പ്രധാനമന്ത്രി അനുശോചന സന്ദേശത്തില് അറിയിച്ചു.
പത്മശ്രീ അവാർഡ് ജേതാവായ ബിബേക് ഡെബ്രോയ് എഴുത്തുകാരനും കൂടിയാണ്. മഹാഭാരതവും ഭഗവദ് ഗീതയും ഉൾപ്പെടെയുള്ള ക്ലാസിക്കൽ സംസ്കൃത ഗ്രന്ഥങ്ങൾ വിവർത്തനം ചെയ്തിട്ടുണ്ട്. കൂടാതെ പൂനെയിലെ ഗോഖലെ ഇൻസ്റ്റിറ്റ്യൂട്ട് ഓഫ് പൊളിറ്റിക്സ് ആൻഡ് ഇക്കണോമിക്സിന്റെ (ജിപിഇ) ചാൻസലറായി സേവനമനുഷ്ഠിച്ചിട്ടുണ്ട്.
കൊൽക്കത്തയിലെ പ്രസിഡൻസി കോളേജ്, ഗോഖലെ ഇൻസ്റ്റിറ്റ്യൂട്ട് ഓഫ് പൊളിറ്റിക്സ് ആൻഡ് ഇക്കണോമിക്സ്, പൂനെ, ഇന്ത്യൻ ഇൻസ്റ്റിറ്റ്യൂട്ട് ഓഫ് ഫോറിൻ ട്രേഡ്, ഡൽഹി എന്നിവിടങ്ങളിൽ അദ്ദേഹം പ്രവർത്തിച്ചിട്ടുണ്ട്. കൂടാതെ നിയമപരിഷ്കാരങ്ങൾ സംബന്ധിച്ച ധനകാര്യ മന്ത്രാലയത്തിന്റെ/ യുഎന്ഡിപി പദ്ധതിയുടെ ഡയറക്ടറായും സേവനമനുഷ്ടിച്ചു.
നരേന്ദ്രപൂരിലെ രാമകൃഷ്ണ മിഷൻ സ്കൂളിലാണ് അദ്ദേഹം പഠിച്ചത്. പ്രസിഡൻസി കോളേജ്, കൊൽക്കത്ത, ഡൽഹി സ്കൂൾ ഓഫ് ഇക്കണോമിക്സ്, കേംബ്രിഡ്ജിലെ ട്രിനിറ്റി കോളേജ് എന്നിവിടങ്ങളിൽ തുടർ പഠനങ്ങൾ പൂർത്തിയാക്കി. 2019 ജൂൺ 5 വരെ NITI ആയോഗിൽ അംഗമായിരുന്നു അദ്ദേഹം. വിവിധ പുസ്തകങ്ങളുടെയും ലേഖനങ്ങളുടെയും രചയിതാവും എഡിറ്ററുമായി പ്രവർത്തിച്ചിട്ടുണ്ട്. കൂടാതെ നിരവധി പത്രങ്ങളിൽ കൺസൾട്ടിംഗ് എഡിറ്ററായും സേവനമനുഷ്ഠിച്ചു.
