തിരുവനന്തപുരം: പട്ടികവര്‍ഗ വികസന വകുപ്പ് സംഘടിപ്പിച്ച കളിക്കളം 2024 സമാപിക്കുമ്പോള്‍ അതിജീവനത്തിന്റെ കരുത്ത് തെളിയിച്ചിരിക്കുകയാണ് വയനാട്. മത്സരത്തിനെത്തിയ മറ്റു 12 ജില്ലകളെയും പിന്നിലാക്കി ഓരോ ദിനവും ബഹുദൂരം മുന്നേറിയാണ് വയനാട് ജില്ല മുന്നിലെത്തിയത്. 445 പോയിന്റുകളുമായാണ് വയനാട് ഒന്നാമത്തെത്തിയത്. രണ്ടാം സ്ഥാനത്ത് 125 പോയിന്റുകളുമായി മേളയ്‌ക്ക് ആതിഥേയത്വം വഹിച്ച തിരുവനന്തപുരവും മൂന്നാം സ്ഥാനത്ത് 100 പോയിന്റുകളുമായി കണ്ണൂരുമാണ്.
131 പോയിന്റുകള്‍ നേടി കണിയാമ്പറ്റ എംആര്‍എസ് ചാമ്പ്യന്‍മാരായി. 100 പോയിന്റുമായി കണ്ണൂര്‍ എംആര്‍എസ് റണ്ണര്‍ അപ്പാണ്. വ്യക്തിഗത ചാമ്പ്യന്‍മാരായി ടിഡിഒ മാനന്തവാടിയിലെ രഞ്ജിത കെ.ആര്‍., കുളത്തുപ്പുഴ എംആര്‍എസിലെ കൃഷ്ണനുണ്ണി എസ്., കണ്ണൂര്‍ എംആര്‍എസിലെ വിജിത കെ.ബി., തിരുനെല്ലി ആശ്രം എംആര്‍എസിലെ റിനീഷ് മോഹന്‍, കണിയാമ്പറ്റ എംആര്‍എസിലെ അനശ്വര, എംആര്‍എസ് കണ്ണൂരിലെ രാഗേഷ് എ.സി. എന്നിവരെ തിരഞ്ഞെടുത്തു.
വേഗമേറിയ കായികതാരങ്ങളായി കിഡ്ഡീസ് വിഭാഗത്തില്‍ കരിന്തളം ഏകലവ്യ മോഡല്‍ റസിഡന്‍ഷ്യല്‍ സ്‌കൂളിലെ അമൃത എസിനെയും തിരുനെല്ലി ആശ്രം മോഡല്‍ റസിഡന്‍ഷ്യല്‍ സ്‌കൂളിലെ അഖിലാഷ് ആര്‍.ആര്‍. നെയും സബ് ജൂനിയര്‍ വിഭാഗത്തില്‍ ഇന്റഗ്രേറ്റഡ് ട്രൈബല്‍ ഡെവലപ്പ്‌മെന്റ് പ്രൊജക്റ്റ് ഓഫീസ് കല്‍പ്പറ്റയിലെ ശ്രീബാലയെയും ട്രൈബല്‍ ഡെവലപ്പ്‌മെന്റ് ഓഫീസ് മാനന്തവാടിയിലെ നിധീഷ് ആര്‍. നെയും ജൂനിയര്‍ വിഭാഗത്തില്‍ കരിന്തളം ഏകലവ്യ മോഡല്‍ റസിഡന്‍ഷ്യല്‍ സ്‌കൂളിലെ സുബിത ബാബു എം. നെയും കുളത്തുപ്പുഴ എം.ആര്‍.എസ്. ലെ കൃഷ്ണനുണ്ണി എസ്. നെയും സീനിയര്‍ വിഭാഗത്തില്‍ കണിയാമ്പറ്റ എംആര്‍എസിലെ ലയ കൃഷ്ണനെയും ഞാറനീലി ഡോ. അംബേദ്കര്‍ വിദ്യാനികേതന്‍ സിബിഎസ്ഇ എംആര്‍ എസിലെ രാഹുല്‍ ആര്‍. എന്നിവരെയും തിരഞ്ഞെടുത്തു.
ചാലക്കുടി എംആര്‍എസിലെ വൈഗ എം.എന്‍., നിലമ്പൂര്‍ ഇന്ദിരാഗാന്ധി മെമ്മോറിയല്‍ ആശ്രം സ്‌കൂളിലെ ജിതുല്‍ എ. എന്നിവരാണ് വേഗതയേറിയ നീന്തല്‍ താരങ്ങള്‍. കട്ടേല ഡോ. അംബേദ്കര്‍ എംആര്‍എസിലെ അപര്‍ണ എസ്., കണ്ണൂര്‍ എംആര്‍എസിലെ രാഗേഷ് എ.സി. എന്നിവരാണ് മറ്റ് മികച്ച നീന്തല്‍ താരങ്ങള്‍. മികച്ച ആര്‍ച്ചറായി പൂക്കോട് ഏകലവ്യ എംആര്‍എസിലെ കീര്‍ത്തന സി.കെ., ഞാറനീലി ഡോ. അംബേദ്കര്‍ വിദ്യാനികേതന്‍ സിബിഎസ്ഇ എംആര്‍എസിലെ രാജീഷ് കെ.ആര്‍., പൂക്കോട് ഏകലവ്യ എംആര്‍എസിലെ പ്രജിഷ്ണ എം.പി., പൂക്കോട് ഏകലവ്യ എംആര്‍എസിലെ അജില്‍ ജയന്‍ എന്നിവരെ തിരഞ്ഞെടുത്തു. മൂന്നുദിവസങ്ങളിലായി നടന്ന മേളയില്‍ 96 ഇവന്റുകളിലായി 1400 കുട്ടികളാണ് കളിക്കളത്തില്‍ പങ്കെടുത്തത്. സമാപനസമ്മേളനം കായികമന്ത്രി വി. അബ്ദുറഹ്മാന്‍ ഉദ്ഘാടനം ചെയ്തു. മന്ത്രി ഒ.ആര്‍.കേളു അധ്യക്ഷത വഹിച്ചു.
പ്രതികരിക്കാൻ ഇവിടെ എഴുതുക: