കിളിമാനൂര്‍: പുളിമാത്ത് നിന്നും നിരോധിത പുകയില ഉല്‍പ്പന്നങ്ങളുടെ വന്‍ശേഖരം എക്‌സൈസ് സംഘം പിടികൂടി. പുളിമാത്ത് പതിമൂന്നാം വാര്‍ഡില്‍ വാടകവീട്ടില്‍ താമസിച്ചുവന്ന തേമ്പാമൂട് മണലുമുക്ക് പിച്ചിമംഗലം എസ്.എസ്. മന്‍സിലില്‍ ഷംനാദിനെയാണ് എക്‌സൈസ് സംഘം പിടികൂടിയത്.
38 ചാക്കുകളില്‍ സൂക്ഷിച്ചിരുന്ന ഏകദേശം 1480 കിലോ വരുന്ന നിരോധിത പുകയില ഉല്‍പ്പന്നങ്ങളും പിടികൂടി. ആറ്റിങ്ങല്‍ എക്‌സൈസ് സര്‍ക്കിള്‍ ഇന്‍സ്‌പെക്ടറുടെ നേതൃത്വത്തില്‍ ശനിയാഴ്ച വൈകുന്നേരമാണ് പിടികൂടിയത്.
തിരുവനന്തപുരം എഇസി സുഭാഷിന് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ ആറ്റിങ്ങല്‍ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ഷൈബു, ചിറയിന്‍കീഴ് എക്‌സൈസ് ഇന്‍സ്‌പെക്ടര്‍ ദീപുക്കുട്ടന്‍ എന്നിവരടങ്ങിയ സംഘം നടത്തിയ റെയ്ഡിലാണ് നിരോധിത പുകയില ഉല്‍പ്പന്നങ്ങളുടെ ശേഖരം പിടികൂടിയത്. കേസെടുത്ത എക്‌സൈസ് സംഘം തൊണ്ടി സാധനങ്ങള്‍ കോടതിയില്‍ ഹാജരാക്കുമെന്ന് അറിയിച്ചു.
പ്രതികരിക്കാൻ ഇവിടെ എഴുതുക: