കൊല്ലം: ഇന്സ്റ്റഗ്രാം റീല്സ് താരം മോഷണ കേസില് അറസ്റ്റില്. ചിതറയില് ബന്ധുക്കളുടേയും സുഹൃത്തുക്കളുടെയും വീടുകളില് നിന്ന് മോഷണം നടത്തിയ ഇന്സ്റ്റഗ്രാം താരം ഭജനമഠം സ്വദേശിനി മുബീനയാണ് പിടിയിലായത്.പതിനേഴ് പവന് സ്വര്ണം കവര്ന്ന കേസിലാണ് അറസ്റ്റ്.
കഴിഞ്ഞ സെപതംബറില് മുബീനയുടെ ഭര്തൃ സഹോദരി മുനീറയുടെ കിഴിനിലയിലെ വീട്ടില് നിന്ന് ആറ് പവനോളം വരുന്ന താലിമാലയും ഒരു പവന് വീതമുള്ള രണ്ട് ചെയിന്, രണ്ട് ഗ്രാം തൂക്കമുള്ള കമ്മലുകള് എന്നിവ കാണാതായിരുന്നു. എന്നാല് സ്വര്ണം മോഷണം പോയ വിവരം മുനീറ അറിഞ്ഞത് ഒക്ടോബര് പത്തിനായിരുന്നു.
തുടര്ന്ന് പൊലീസില് പരാതി നല്കി. മുബീനയെ സംശയമുണ്ടെന്നും മുനീറ പൊലീസിനോട് പറഞ്ഞിരുന്നു. ദിവസങ്ങള് നീണ്ട അന്വേഷണത്തിനൊടുവില് ചിതറ പൊലീസാണ് പ്രതിയെ അറസ്റ്റ് ചെയ്തത്.
മുബീനയുടെ സുഹൃത്ത് അമാനിയും കഴിഞ്ഞ ജനുവരിയില് സമാനമായ മറ്റൊരു മോഷണ പരാതി ചിതറ സ്റ്റേഷനില് തന്നെ നല്കിയിട്ടുണ്ട്.ആ പരാതിയിലും മുബീനയെ സംശയമുണ്ടെന്ന് പറഞ്ഞിരുന്നു. ഈ കേസില് അന്വേഷണം നടന്നുവരവെയാണ് മുബീനക്കെതിരെ പുതിയ ഒരു പരാതി ഭര്തൃ സഹോദരി നല്കിയത്.
