തിരുവനന്തപുരം: വനിതാ ട്വന്റി20യില് ഹരിയാനയ്ക്കെതിരെ കേരളത്തിന് 20 റണ്സിന്റെ വിജയം. അര്ദ്ധ സെഞ്ചുറി പ്രകടനവുമായി തിളങ്ങിയ അക്ഷയയുടെ ബാറ്റിങ്ങാണ് കേരളത്തിന്റെ വിജയം ഉറപ്പാക്കിയത്.
ലക്നൗവില് നടന്ന മത്സരത്തില് 52 പന്തുകള് നേരിട്ട അക്ഷയ അഞ്ച് ഫോറും ഒരു സിക്സും ഉള്പ്പെടെ 60 റണ്സാണ് നേടിയത്. അവസാന ഓവര് വരെ ആവേശം നിറഞ്ഞു നിന്ന മത്സരത്തിലായിരുന്നു കേരളത്തിന്റെ വിജയം. മത്സരത്തിന്റെ തുടക്കത്തില് തന്നെ ആദ്യ വിക്കറ്റ് നഷ്ടമായ കേരളം കളി തിരികെ പിടിച്ചത് അക്ഷയയുടെ മികച്ച ബാറ്റിങ്ങിലൂടെയായിരുന്നു. തലശേരി സ്വദേശിയായ സദാനന്ദന്റെയും ഷീജയുടെയും മകളാണ് അക്ഷയ.
